تامر أمين يكشف تفاصيل صفقة الأهلي الجديدة
أكد الإعلامي تامر أمين؛ أن النادي الأهلي قد نجح في ضم المهاجم البرازيلي سوزا لاعب نادي شونبوك الكوري الجنوبي.
وقال أمين خلال برنامج "أخر النهار" المذاع على قناة "النهار": "أخيرا وبعد ما فكينا العمل وشيلنا الحجاب والأهلي توصل إلى صفقة المهاجم؛ من هو المهاجم؟ هو سوزا؛ ومتعرفش تفرح والا تحزن لأن الأهلي بيتكلم على موليكا وسوزا بقالنا سنين؛ سوزا كان مطلب رئيسي لمارسيل كولر".
وأضاف: "قالهم أنا عايز دة عشان بيعمل كذا وكذا والحقيقة أن دي حاجة حلوة في إدارة الأهلي؛ في أندية تانية بتعمل أخطاء رغم أنها بتفتح خزينها ولكن بتجيب لاعيبة على مزاجها تلاقي عضو مجلس إدارة أو رئيس نادي يقول أنا جبتلكم فلان طيب هل الفريق محتاجه مش مهم".
وتابع: "الأهلي ممكن يكون لاعب بيتشقلب في الجو بس يسأل المدير الفني يلزمك؟ لو قال لا يبقي ميسواس اتنين دولار ونص؛ سوزا وصل القاهرة إلا أنه بيخضع للكشف الطبي الكامل والصح لازم يتعمل حتى لو بيخرم الحيطة بايديه".
وواصل: "الأهلي عايز يشوف التوقيت المناسب عشان يقدمه في الوقت الصح خاصة أن باب الانتقالات مقفلش وممكن يكون مش الأخير خصوصا أن الهلال السعودي بعد الـ 114 لاعب اللي ضمهم الأسبوع اللي فات استغنوا عن موسى ماريجا وكان من المهاجمين الممتازين وضخم البنيان كدة".
وأكمل: "مش بعيد ماريجا يلف ويجي ولكن بنسبة كبيرة خلال الأيام القادمة الأهلي هيعلن التعاقد مع سوزا؛ ساعة ما وافق الأهلي على بيع محمد شريف لنادي الخليج السعودي تأكدت أن المهاجم الجديد تحت أيدينا؛ مستحيل أنك تفرط في مهاجم ألا والمهاجم جه".
وأوضح: "الأهلي كان متخيل أنه من أسبوع كدة لما يقول للقندوسي أحنا هنعيرك أنه هيوافق؛ القندوسي زمزق وهو عنده جزء من الحق في زمزقته؛ هو قال أنا جاي ألف في الأهلي وأشارك محليا وأفريقيا ولما تعيرني يا أهلي لنادي محلي مبيلعبش أفريقيا يبقي أنا اسمي لا بلعب في الأهلي ولا في أفريقيا".
واختتم: "متقدرش تكبت طموحات أي لاعيب؛ معلوماتي من خلال مصادري أنه امبارح ابتدا يقتنع شوية خصوصا مع حتة أنه لما كان يقبل الإعارة لنادي في مصر كانت فلوسة هتنزل شوية يبدو أن الأهلي قالوله الفرق عندنا ودا اللي ظبط شوية والكلام بيقول احتمال النهاردة أو بكرة يتم الإعلان عن إعارة القندوسي لاحد الأندية المصرية".
