محمد الباز يعلق على شائعات وفاة عادل إمام
علق الإعلامي محمد الباز؛ على الشائعات المتداولة على مواقع التواصل الاجتماعي بشأن وفاة الفنان عادل إمام.
وقال الباز خلال برنامج "أخر النهار" المذاع على قناة "النهار": "مش غريب أبدا اننا نكون مهتمين بكل ما يخص الفنان عادل أمام لأن عادل إمام ليس مجرد ممثل سينمائي أو مسرحي ولكن عادل إمام واحد من الأيقونات المهمة في حياتنا".
وأضاف: "بعض الحسابات على وسائل التواصل الاجتماعي روجت اخبار عن وفاة الفنان عادل إمام مما اضطر الدكتور أشرف زكي أنه يطلع وينفي هذه الاخبار ويقول بشكل واضح جدا يا جماعة الأستاذ عادل أمام صحته كويسة ولو في حاجة احنا هنعلنها".
وتابع: "لو هناك وفاة لعادل أمام هيطلعوا يقولوا سواء اسرته أو النقابة؛ ولكن الحكاية بردو والسؤال هو ليه بيحصل كل شوية دة؟ لأنه ببساطة شديدة الناس مهتمة بكل ما يخص عادل إمام ويمكن اسرته بتسلك سلوك ما؛ وهذا حقها؛ الفنان عادل أمام خلاص مش هيرجع يشتغل تاني؛ الأستاذ عصام إمام شقيقه من كام يوم بيقول عادل أمام لم يعتزل".
وواصل: "الفنان عادل أمام اعتزل اعتزال اضطراريا؛ الراجل مش هيقدر يشتغل ومش مطلوب منه أنه يشتغل الراجل أدى ما عليه وزيادة؛ لما طلعت الفنانة مادلين طبر وقالت إنها كانت تتمنى تشوف الفنان عادل أمام وهو بيكرم على المسرح وقالت في زلة لسان أنها حست أن عيلته عاملة إقامة جبرية لعادل إمام".
وأكمل: "سيبك من أن مادلين طبر لم تخطيء في التوصيف لأن الفنان عادل أمام أقرب ما يكون للإقامة الجبرية؛ لكن في لخبطة جاية من العيلة بمعني أن أبنائه وأنا بحترم وأقدر رامي ومحمد عادل أمام محافظين على والدهم ومبتكلموش".
وأوضح: "يمكن الراجل حالته الصحية لا تسمح بأنه يخرج ويتواجد في الحياة العامة ولكن هو مستمتع مع عيلته ويمكن حالته الصحية متساعدوش أنه ينخرط بالمجتمع ولكن موجود في البيت وعيلته بتقول والله دا أبونا وجد ولادنا وقاعد في البيت أنتوا مالكم ودا فريق من عيلته عادل أمام".
واختتم: "وفي فريق تاني بيتزعمه عصام أمام ويمكن لأسباب تتعلق أنه منتج وكل شوية يقول إنه بيقرا أعمال وممكن يرجع تاني وده اللي عامل اللخبطة؛ الواقع بيقول إن عادل إمام أنهى مسيرة العمل الفني باعتزال اجباري؛ أنا بس بأسف عشان الناس اللي كل شوية تطلع تقول وفاة عادل أمام؛ انتوا مستعجلين على ايه؟ هذا خبر يؤذي اسرته ومحبيه".
