تامر أمين: "متساعدوش الشحاتين.. دول مافيا أغنى مني ومنك"
طالب الإعلامي تامر أمين؛ المواطنين بتشجيع الشباب الذين يبحثون عن الرزق الحلال وعدم دعم المتسولين ومنحهم الأموال مشيرا إلى أنهم يتخذون التسول مهنة.
وقال أمين خلال برنامج "أخر النهار" المذاع على قناة "النهار": "أمبارح في ظل متابعتي للسوشيال ميديا لقيت فيديو مش بس أثر فيا وعجبني ولكن عرفت أنه على الأصل دور والخير والنظافة والاحترام والأخلاق والتدين موجودين مهما كانت الضغوط والمبررات والأزمات".
وأضاف: "الفيديو متصور صدفة لبائع فريسكا في الشارع واحد وقفه من البلوجرز واللي بيعملوا فيديوهات وعمل معاه حوار والله لا أعرف اسمه ولا مكانه؛ من كلامه عرفت معدنه ودا معدن دهب وفص ألماظ".
وتابع: "الحقيقة أنا مش بس ذيعت الفيديو عشان احييه ولكن عشان أقولكم اللي يشوفوا في الشارع يشتري كل اللي معاه؛ مش بس عشان أقولكم ساعدوه وحيوه وأنه نموذج رائع ولكن النقطة التانية أني اقولكم ساعدوه".
وواصل: "ساعدوه وساعدوا اللي زيه هما دول اللي يستحقوا المساعدة مش المتسولين ولا الشحاتين اللي بيقفوا في المطبات والكباري ويقعد يقولك أنا معايا أربع عيال وهو يقدر يشتغل في ناس بتقولك أنا بساعدهم لأن نيتي خير
وأوضح: "لو نيتك خير ساعد دة متساعدش دول لان دول مرتزقة ومافيا وأغنى مني ومنك؛ ثم إن ديننا مقالناش أن دول يستحقوا المساعدة دا قالك تحسبهم اغنياء من التعفف؛ عنده عفة نفس أنه ميسألش فتحس أنه مش محتاج وغني".
وأكمل: "اللي بيسعى على أكل عيشة في الحلال ساعده عشان ميفقدش إيمانه باللقمة الحلال؛ ساعدوه وساعدوا اللي زيه؛ أنا ذيعت الفيديو عشان أوريكم التمسك بالحلال والدين والشرف رغم كل الضغوطات؛ الراجل دة مخلف وبيقولك عايز أأكل أبني بالحلال".
وذكر: "عشان البهوات اللي بيرتشوا ويغشوا ويمصوا دم الغلابة وبيفتحوا الدرج؛ ويقولك عشان المعيشة صعبة انت مش شايف؟ أنا اللي بقوله أنت اللي مش شايف؟ يارب فكرة ضيق المعايش دي متخليناش نفتح باب الشمال".
واختتم: "الفساد الموجود في مصر والمتجذر وفي ناس عددهم مش قليل؛ بقينا ندلع الفساد بدل رشوة بقينا نقول اكرامية وكل سنة وأنت طيب وهات حاجة حلوة لولادك ومش عاجب المرتب اللي بتخده سيب المرتب وروح اتشقلب في القطاع الخاص وطلع لقمتك بايدك".
