تامر أمين يوضح جهود الحكومة لإنهاء أزمة السجائر

أكد الإعلامي تامر أمين؛ أن الحكومة اتخذت قرارات من شأنها إنهاء أزمة السجائر التي ارتفعت أسعارها بشكل غير مسبوق.

وقال أمين خلال برنامج "أخر النهار" المذاع على قناة "النهار": "الحكومة في مسألة السجائر حسة بمعاناة المواطن؛ كل المدخنين خلال الأسبوعين اللي فاتوا كانوا خرمانين بامتياز ليه؟ عشان مش لاقيين سجايرهم؛ الدكتور مصطفى مدبولي اعطى تعليمات شديدة في حاجتين أولا الأجهزة الرقابية تنزل بحملات عشان الناس اللي بتحتكر وتبيع الكلام دة لازم يطلع ويتعرض للناس".

وأضاف: "التوجيه التاني من الدكتور مصطفى مدبولي كان للشركة الشرقية المنتجة للسجائر وهي زودوا الإنتاج واحنا هنزود المادة الخام واحنا هننسق معاكم المعروض دة نازل فين".

وتابع: "في واقعة حصلت مديرية تموين الدقهلية ضبطت سيارة نقل فيها شوية مهربات؛ فيها ايه؟ 45 كرتونة سجائر وكرتونة معسل باجمالي 9 كجم و17 زجاجة بيرة و16 زجاجة أي دي؛ أيه ياعم الحج دة؟ دا لو أبليس سايق العربية مش هيبقي معاه الموبقات دي كلها؛ فاضل يبقي شايل وأد بنات وقمار وتبقى جهنم الحمراء".

وواصل: "في الاخر بيزعلوا لما نخبط في الناس دي ويقولك لا انتوا بتشوهونا؛ مهو من اللي بتعملوه في الناس؛ أنتوا مش بتصلوا ومش بتركعوها؟ الغريب أنك تلاقيه في الجمعة وزبيبة الصلاة؛ هو دة حرام ودة حلال وهو اللي يجي في مصلحتي يبقي حلال واللي مش بخسر بيه يبقي حرام؟".

وأوضح: "كنت مرة في أوروبا وقاعد في ندوة فيها شيخ من المستشرقين وهو واحد انجليزي وأسلم وكان في خطبة بمجموعة من الناس؛ وقالهم أنا بستغرب أوى الواحد مننا يروح مطعم في إنجلترا ولما يلاقي طبق فراخ يسأل الراجل دة حلال؟ ويسأل 60 سؤال عن الفراخ حلال أو لا؛ ويطلع برة المطعم يغش في المعاملات التجارية ويعامل جاره وحش ويتربح من الحرام؛ يعني الفلوس اللي بتجبها حرام والمهم أنك تصرفها في فراخ مدبوحة حلال؟".

وشهدت أسعار السجائر في مصر زيادات متتالية في خضم حُمى الارتفاع التي ضربت أسعار مختلف السلع، في خطٍ متوازٍ مع الضغوط الاقتصادية الناجمة عن تداعيات التطورات الجيوسياسية التي يشهدها العالم، وأثرها على ارتفاع معدلات التضخم بشكل غير مسبوق في البلاد.