محمد الباز يكشف عن تورط رجال أعمال وشركات سياحة في جمع الدولار
كشف الإعلامي محمد الباز، عن تورط بعض شركات السياحة وبعض رجال الأعمال في السوق السوداء للعملة الأجنبية من خلال جمع الدولار خارج منظومة البنوك.
وقال الباز خلال برنامج "أخر النهار" المذاع على قناة "النهار": "في جريمة ترتكب؛ والجريمة هنا أتمنى أن أجد لها أذان صاغية؛ في مشكلة في تحويلات المصريين بالخارج أه في؛ وفي نشاط اقتصادي بيحصل والعملة الصعبة مبتجيش البلد؟ أه بيحصل وأنا بتكلم عن مشاهدات رجل أعمال كبير جدا وقالي نصا في شركات سياحة بتجيب أفواج؛ شركة السياحة بتاخد منه التكلفة بتاعته؛ قالك الوفد بيحطوا الدولار في حساب الشركة برة ولما بيجي مصر بيكون حاطط كمان فلوس الشراء في مصر وهنا الشركة بتديله فلوس مصري".
وأضاف: "دا اسمه تخريب يصل لمرحلة الخيانة العظمى وممكن الجهات الرقابية تفتش في الموضوع دة؛ في شاهد عيان على الناس دي بيقولك لا المسألة أكبر من كدة؛ شركات السياحة بتجيب السياح تاخد منهم بالدولار وتديهم مصري يصرف نفسه بيه".
وتابع: "في رجال أعمال بعينهم باسمائهم بيروحوا برة يشوفوا المصريين بالخارج ياخد منه الدولار ويجي يدي لأهله الفلوس بالجنيه مستغلا أن في سعرين للعملة؛ بدل ماهو في البنك بـ30 يديله أربعين؛ والراجل برة يقولك طيب ما أنا أولى بالفلوس".
وأكمل: "أنا هنا قدام مشكلة كبيرة جدا وكأن البلد دي كل واحد عايز ياخد منها حاجة يمد إيديه وياخدها بعنف؛ أنا بتكلم هنا عن نموذجين ومش من وحي الخيال؛ ناس في السوق بتقول هذا الكلام؛ في شركات سياحة متورطة في هذا الأمر؛ رجال الاعمال اللي بيروحوا يخدوا الفلوس من المصريين برا ويجيوا يدوا الفلوس للناس هنا بالجنيه".
وأوضح: "احنا اللي بنعمل الازمة؛ المفروض المصريين يشاركوا في الموضوع وإذن تلاقي المسألة دا مبيشاركش دا بيهد؛ دا كلام؟ طيب يرضى مين وترجع تقول ياحكومة مبتوفريش الدولار؛ الدولة بتقفل استيراد سلع معينة عشان نجيب السلع الأساسية؛ الدولة مبتقفلش استيراد سلع عشان تضايقك وخلاص ولكن بتقفل عشان عايزة الدولار تستورد بيه سلع أساسية".
واختتم: "أفراد مننا بيعملوا المشكلة؛ ليه في ناس كتير جدا بتتعامل مع مصر كأنها سبوبة شوف هتكسب منها قد ايه؟ أنا بقول ياريت الحاجات اللي بنتكلم فيها دي يبقي في صدى لأن دي عوامل أساسية في الازمة اللي احنا عايشين فيها".
