عاجل| "إمبراطورية مشمش".. الباز يكشف كلمة السر في أزمة السجائر

علق الإعلامي محمد الباز؛ على أزمة ارتفاع أسعار السجائر؛ مشيرا إلى أن هناك بعض المحتكرين الذين يتربحون من الأزمة الحالية.

وقال الباز خلال برنامج "آخر النهار" المذاع على قناة "النهار": "إحنا كنا فتحتا موضوع أسعار السجائر؛ وأسعار السجائر حاجة مزعجة وشوف رغم عدم عدالة القضية لأن أنت بتتكلم عن سلعة هي بتموت الناس شئنا أم أبينا؛ المدخنين عارفين قبل غير المدخنين أن التدخين بيدمر الصحة ولكن المسألة مش داخلة في حكاية الصحة دي داخلة في مسألة اقتصاد".

وأضاف: "الإنتاج بيطلع والشركة بتطلع السجائر من 70 إلى 75% من انتاج السجائر؛ وقالك عندي موزعين معتمدين لإنتاج السجائر ولكن في أيد بتلعب في الشارع؛ تلم السجائر دي وتخزنها بطريقة ما؛ العلبة تبقي بـ24 جنيه وتروح تشتريها بـ50-55 جنيه".

وتابع: "الداخلية بتقوم بجهود كبيرة جدا في ضبط الناس المحتكرين للسجائر واستعرضنا جهود الداخلية في أكتر من مكان ولكن يبدو أن في محتكرين كبار جدا؛ امبارح رسالة من أحد المشاهدين على الهوا قالك ياجماعة روحوا في باب البحر شوفوا مشمش والحوت".

وواصل: "لما دورنا مثلا على حكاية مشمش والحوت لقينا مشمش جوهرة باب البحر؛ صفحة على الفيس بوك شركة بتعمل الحكاية دي ومش دي المشكلة ولكن المشكلة أني لقيت بوست كاتبه كدة وأتمنى الناس المهتمين بضبط السوق؛ طلع في مشمش أنا اعتقدت أن الراجل بيهزر ولكن طلع في مشمش".

وأكمل: "الصفحة بتاعة مشمش بتقول ايه؛ (تم نفاذ حصة الشركة من السجائر المصري؛ ومواعيد صرف حصة الشركة الشرقية يوم الخميس والاتنين من كل أسبوع وانتظروا اشعار جديد بوجود كمية جديدة قريبا)".

وذكر: "فيما يبدو أنه احنا عندنا لعب ظاهر في مسألة سوف السجائر واللعب هو اللي مؤدي إلى حالة التوتر دي؛ أنا عيني على استغلال اللي بيحصل دة في ضرب امنك بشكل عام؛ في كلاب مسعورة قاعدة منتظرة أي حاجة فيها مشكلة".

واختتم: "أمبارح رئيس الشركة الشرقية للدخان بيقول علبة السجائر بتطلع من عنده 21 جنيه وعشان يبيعها بسعر 24 جنيه؛ احنا عيشنا سنين أي واحد بيزود تعريفة على سلعة كانت بتتعمل له قضية أمن دولة؛ أي تاجر كبير أو صغير يزود قرش على سعر السلعة تتعمله قضية أمن دولة؛ هنا أنا عندي واحد محتكر والناس من امبارح بيمدونا بمعلومات عن امبراطورية مشمش بنروح لمشمش يقولك مفيش سجاير وهو السجائر جوة".