أول تعليق من زوج صاحبة منشور مندوب التوصيل الشرعي
مازالت أصداء واقعة مندوب التوصيل تثير جدلا واسعا على السوشيال ميديا، وذلك بعد تعليق تمام محمد زوج رانية سنوسي صاحبة منشور مندوب التوصيل الشرعي.
وكتب تمام عبر موقع التواصل الاجتماعي "فيسبوك": “دي صورة أوردر كانت طالباه زوجتي من بنت على فيسبوك وواضح جدا تفاصيل الأوردر لأنه جاي من مكان قريب فمش متقفل.. اللي حصل بقى زي ما حكت زوجتي الكريمة -اللي ضفرها أفضل مليون مرة من أي واحد أو واحدة اتريقوا وعلقوا تعليقات قذرة على البوست- إن المندوب شافه وشاف إنه مش لبس خروج شرعي بس ممكن ناس تخرج بيه عادي -وهم أحرار طبعا- فطلب من اللي باعتاه تسأل لو هيتلبس برا البيت مش هيوصله ودا أمر نادر وغريب في الزمن دا عشان كدا رانية نزلت بوست بالموقف لعله يكون سبب في باب رزق ليه ولحد هنا الأمر عادي”.
وأضاف زوج رانية سنوسي صاحبة منشور مندوب التوصيل الشرعي: “مش عادي بقى إن المرضى عُبَّاد الشير واللايك واللي للأسف الشديد منهم بنات ما كانش فيه وقت عند أهلهم يربوهم شيّروا البوست وكتبوا كلام قذر وخدوا البوست في طريق تاني رغم إن الكلام واضح بس للأسف في قلوبهم مرض فزادهم الله مرضا ولهم عذاب أليم بما كانوا يكذبون”.
وتابع تمام: البوست دا مش بصدد الدفاع عن زوجتي لأن مقامها معروف ومحفوظ ما فيش حد هيقرب منه ولا هيطوله وإنما لتوضيح الصورة الواضحة وحجة على كل واحد وواحدة قالوا قي حقها كلمة مش كويسة.. وأخيرًا أفكركم بقول ربنا سبحانه: "إن الذين جاءوا بالإفك عُصبة منكم لا تحسبوه شرًّا لكم بل هو خير لكم لكل امرئ منهم ما اكتسب من الإثم والذي تولى كبره منهم له عذاب عظيم".
