تامر أمين يفتح النار على محمد رمضان: "عندك مشكلة مع التشيرتات؟"
هاجم الإعلامي تامر أمين؛ الممثل محمد رمضان على خلفية قيامه بخلع ملابسه مجددا خلال احدى الحفلات في الساحل الشمالي.
وقال أمين خلال برنامج "أخر النهار" المذاع على قناة "النهار": "كشف القلع دة مش ممكن؛ ليه في كل حفلة لازم أقلع؟ الجو حر علينا كلنا ينفع أجي أقدم البرنامج ملط؟ مش عارف الموازين في دماغ الناس مبتبقاش منضبطة ليه؛ خصوصا لما أكون مش محتاج ودي نقطة مهمة فارقة معايا".
وأضاف: "زي ما تلاقي حد بيسرق مع الفارق في القياس يعني؛ فتظبطه وتكتشف أنه مليونير؛ بتسرق ليه يا أبني يقولك طمع وحب في زيادة المال وتبقي عايز تخنقه وحد تاني بيسرق عشان ياكل فيصعب عليك؛ السرقة حرام عموما؛ بس اللي مش محتاج مفروض ميعملش بالو".
وتابع: "اللي يعمل البالو حد صغير حد نكرة حد مش معروف عايز يعمل دوشة أو حاجة شاذة ويتعرف؛ بردو غلط بس أهو نكرة وعايز يتعرف؛ لكن لما تبقي نجم النجوم وأكثرهم شعبية ونجاحا وفلوسا يبقى لزمته ايه اثارة الإثارة والاتيان بأفعال استثنائية تجبلي الانتقاد إلا إذا كنت كييف عايز أعمل كدة عشان يتقال عليا كدة".
وواصل: "الموهبة الجميلة محمد رمضان؛ واحد يعمل مسلسل جعفر العمدة يبقي عايز يعمل بعده كدة؟ المسلسل خرج برة السباق الرمضاني إلى ظاهرة اجتماعية والمجتمع المصري والعربي كان بيتكلم عن جعفر العمدة وأبنه سيف وهيلاقيه أمتي عايز ايه بعد كدة؟ ربنا بيثبت لك يا محمد يارمضان ولكل الناس أنه عملك ممكن يتحدث عنك من غير ما تعمل حاجة؛ اشتغل واعمل مسلسل كويس كسر الدنيا".
وأختتم: "ربنا بيقولك أعمل شغلك صح وأنت موهوب؛ أجي بعديها أقوم طالع في حفلة واتكلمنا في الموضوع دة قبل كدة ونقابة المهن الموسيقية قالت التزم يا محمد يقوم من فترة من كام يوم حفلة لمحمد رمضان في الساحل الشمالي يطلع نصف عاريا؛ ليه؟ أنت عندك مشكلة مع التشيرتات؟ عندك حساسية من القمصان؟ لو في مشكلة نحلها وملناش دعوة بالغرب؟ الغرب عندهم بلاوي سودة هنعمل البلاوي السودة محدش يقولك أصل دة الفن؛ كل فن لمجتمعه وكل فن لدينه".
