أحمد موسى: اليوم قد يكون تجربة على تقليل تخفيف احمال الكهرباء

علق الإعلامي أحمد موسى؛ على إعلان رئيس مجلس الوزراء اليوم عن تفاصيل إجراءات تخفيف الأحمال الكهربائية خلال المرحلة المقبلة.

وقال موسى خلال برنامج "على مسؤوليتي" المذاع على قناة "صدى البلد": "رئيس الوزراء ترأس لجنة إدارة الأزمات الخاصة بالكهرباء؛ هيبقي عندنا 3 محافظات مفيهاش قطع للكهرباء وهي مطروح وسيناء والبحر الأحمر لأنه وجدوا استهلاكهم للكهرباء محدود ومفيش ضغط".

وأضاف: "الأمر التاني أنه النهاردة تقريبا مكانش في تخفيف احمال أو قطع كهرباء بنسبة 95-97% قطع الكهرباء النهاردة نسبة لا تتجاوز 2-3% بالكتير في ناس قطعت عندهم الكهرباء يمكن نص ساعة أو ساعة؛ تخفيف الأحمال أو قطع الكهرباء مستمر معانا حتى منتصف سبتمبر القادم".

وتابع: "المحافظات أعلنوا الإجراءات الخاصة بتخفيف الاحمال بالجداول؛ المحافظات النهاردة نزلت الجداول؛ حضرتك عايز تعرف المحافظة أو المركز أو المدينة بتاعتك هتعرف التفاصيل الخاصة من خلال موقع المحافظة وهتعرف التفاصيل الخاصة بتخفيف الاحمال".

وواصل: "الخبر الإيجابي المهم أن شحنات المازوت وصلت وفي شحنات إضافية قادمة؛ بنتكلم عن تعاقدات تصل إلى 300 مليون دولار وعندنا أولوية النهاردة نوفر الـ 300 مليون دولار لتوفير المازوت بالإضافة إلى أن الغاز شغال معندناش مشكلة في الغاز الحمد لله".

وأكمل: "النهاردة قد يكون بداية تجارب هل التخفيف الذي قل كثيرا اليوم في إطار تجربة أن أحنا نعرف الاستهلاك بتاعنا كام والامكانيات قد اية والغاز والمازوت اللي عندنا هل يقدر يخلي التخفيف الفترة القادمة قليل للغاية؟ قد تكون النهاردة تجربة عشان نصل لمرحلة أنه خلال الازمة انحلت هيجي يوم إن شاء الله دولة رئيس الوزراء يطلع يقولنا انتهت الأزمة".

وأوضح: "النهاردة بقولكم بداية تجربة عشان كدة تخفيف الاحمال كانت محدودة جدا؛ النهاردة درجة الحرارة كويسة وامبارح نفس الحكاية واخر الأسبوع قد ترتفع درجات الحرارة شويتين؛ الدولة النهاردة بتعمل كل شغل والكل حريص على ترشيد الطاقة".

واختتم: "التنسيق على مدار الساعة بين الكهرباء والبترول وأي حد عنده مشكلة يكلم مجلس الوزراء يكلم الكهرباء يكلم المحافظات اللي هو تابع ليها تقدر تعرف الحكاية أولها ايه واخرها ايه؛ عندنا 3 محافظات مفيش تخفيف احمال عندهم وعندك 24 محافظة فيهم تخفيف أحمال".