عمرو أديب يهاجم رئيس الوزراء: "مش عارف يحل أزمة الكهرباء"
انتقد الإعلامي عمرو أديب؛ رئيس الوزراء الدكتور مصطفى مدبولي على خلفية وعودة بحل أزمة الكهرباء والتي لم ينجح في تنفيذها.
وقال أديب خلال برنامج "الحكاية" المذاع على قناة "أم بي سي مصر": "اللي مبفهموش حاجات تانية؛ القضية مش في الأزمة الاقتصادية ولكن في كيفية مواجهتها؛ من الاعراض الجانبية للأزمة الاقتصادية وقلنا في البرنامج ده أنه مفيش وقود؛ وأن المصريين عرفوا حقيقتين واضحين؛ أيوة عندنا محطات كهرباء عظيمة ولكن لن تعمل إلا بالوقود".
وأضاف: "الحاجة التانية أنه احنا الوقود اللي عندنا مش دايما كافي؛ الوقود وأنا بقول الكلام وعارف أنا بعمل ايه لأنه لو كافي كان زمانه كافي؛ أنا مش واقف عند دة كله ممكن يكون مش معاك فلوس تجيب مازوت زي ما يكون عندك عربية لامبورجيني ولكن مفيش بنزين".
وتابع: "احنا فاهمين أن في مشكلة مازوت أما مشكلة الغاز في تفاصيل كتير أنا مش هدخل فيها؛ أنا فاهم أن المحطات عايزة وقود والوقود مش موجود لسبب أو لأخر؛ بايعه برة بالدولار محتاج الفلوس قولي أي حاجة أنا تحت أمرك".
وواصل: "أنا واقف عند أنه الأسبوع اللي فات السيد رئيس الوزراء قال ياجماعة أدوني الأسبوع الجاي والموضوع يخلص وللأسف في اعلاميين ومسؤولين كتير قالوا بالكتير الأربع الجاي الموضوع هيخلص".
وأكمل: "أما يطلع رئيس الوزراء يوم الخميس ويقولك قدامنا كدة أغسطس وستمبر؛ الفرق بين يومين أو شهرين ايه؟ أنا بتكلم على ياجماعة فين التخطيط فين الرؤية فين المعلومة؛ رئيس وزراء مصر مش عارف الفرق بين الأسبوع الجاي وبين شهرين؟".
وأوضح: "قالوا أسوأ وضع نص ستمبر وأنا مش معترض؛ المصريين وصلوا لمرحلة أنه خلاص في مشكلة بس أبقى قولنا أمتي هيتقطع والنهاردة قالهم أغسطس هيبقي صعب ورئيس الوزراء قال ساعة أو اتنين عارفين اللي بيقرأ الفنجان؟".
وذكر: "منين التلات والاربع الجايين؛ الوزارة كلها قررت أنها تغسل أيديها وفي حد يتحمل المسؤولية والكل حمل المسؤولية لرئيس الوزراء؛ النهاردة الكلام ايه أحنا بنتكلم أن عندك أزمة كهرباء شهرين؛ سؤال ليه؟ محدش عارف يقولك مهو ضغط الغاز".
واختتم: "احنا اتقالنا لغاية 35 درجة وفوق كدة المحطة يبقي فيها مشكلة؛ أنت بتقولي كدة عشان الوقود اللي محطوطلك ميكفيش غير كدة؛ أنت قررت تضلم الشوارعه وتقفل الإعلانات وكل دة مش هيعمل حاجة وكمان النور يتقطع؛ هي الوزارة عملت ايه؟ ايه المجهود في مواجهة الأزمة اللي الوزارة عملته".
