تامر أمين: في حد "سخن" الشيبي بعد واقعة حسين الشحات

علق الإعلامي تامر أمين، على واقعة اعتداء حسين الشحات لاعب الأهلي على محمد الشيبي لاعب بيراميدز خلال مباراة الفريقين بالدوري.

وقال أمين خلال برنامج "أخر النهار" المذاع على قناة "النهار": "هما شافوا اللايحة بتاعة اعتداء لاعب على لاعب بدون كرة ايه؛ كانت مباراتين إيقاف و20 ألف جنيه ونادي بيراميدز من حقه يتظلم وتنقعد لجنة الانضباط وتشوف هل العقوبة كافية ونثبتها أو نخلي الإيقاف أربع أو تلات مباريات".

وأضاف: "اللي مخلصتش هي موجة السوشيال ميديا وناس لقت فرصة رائعة لتشويه الشحات وكل ما تيجي النار تهمد يتحط ليها نقطتين بنزين؛ مسؤولي بيراميدز قالوا هنقاضي الشحات وهي فرصة شافوا انهم يستغلوها وحقهم في قانون في مصر والدستور يكفل حق التقاضي للجميع".

وتابع: "رأيي المتواضع مع المستشارين اللي استضفناهم وكان معايا المستشار هيثم عباس المحامي الشهير على الهواء وقال هذه الواقعة لا تخضم لساحات القضاء ولو بيراميدز راح لساحات القضاء ستحسم القضية أو براءة من اول جلسة".

وأوضح: "تأثير السوشيال ميديا رهيب ولما تدخل في الهوجة صعب وقتها تركز وتشوف ايه الصح وايه الخطأ؛ من شيم الرجال أنهم يعتزروا ومع اعتذار الشحات لا يجب أن العقوبة تلغى وإدارة الازمة في الأهلي ممتازة وسلوك اللاعب بعد اقراره بالخطأ من شيم الرجال المحترمين".

وواصل: "الواقعة خلصت ولكن السوشيال ميديا مش عايزاها تخلص؛ حسين الشحات بعد الخطأ عمل ما يجب أن يعمل كلنا خطأؤن وكل الخطأئين التوابون؛ مفيش حد فينا مبيغلطش ولكن أحسن حد فينا لما بيغلط أما يعتذر عنه".

وأكمل: "حسين الشحات تراضي مع محمد الشيبي وأنا رأيي أنه كان كافي؛ وفي صورة للشيبي وهو بيضحك لما حسين الشحات باس راسه واللي يشوف الصورة بيقول أنه سامحه والوش اللي شفناه دة بيقول أنه متقبل وكمان حاجة تدل أن في حاجة حصلت بينهم ضحك ووشه تهلل".

وذكر: "بعد الماتش تاني يوم في حد سخن الشيبي؛ هو سافر السعودية بعد الماتش عشان يعمل عمرة ولو كان غضبان كان انتظر وقال مش همشي ألا ما اخد حقي؛ وحد كلمة بقي وقاله أرجع أحنا هنولع القصة في حاجة غلط حصلت بعديها خلته يرجع ويقطع العمرة".