مصطفى بكري: "الحكومة مش مسؤولة عن مشكلة الكهرباء لازم نصبر ونعدي الازمة"
أكد الإعلامي مصطفى بكري؛ أن الحكومة ليست مسؤولة عن أزمة الكهرباء مشيرا إلى أن ما يحدث ليس بسبب نقض الغاز الطبيعي.
وقال بكري خلال برنامج "حقائق وأسرار" المذاع على قناة "صدى البلد": "اللي بيحصل من قطع للتيار الكهربائي ملوش علاقة بعدم توفير الدولة للغاز الطبيعي أو بسبب المشروعات القومية أو غيره من الكلام اللي بيتقال أو بيتردد".
وأضاف: "الكلام اللي قاله رئيس الوزراء وتحليله للأزمة وكلامه عن محطات الكهرباء والحسابات بتاعتنا اللي بنتعامل على أساسها يقول إن القضية بالأساس مرتبطة بنقص المازوت؛ رئيس الوزراء قال بنوقف تصدير الغاز خلال الصيف والمازوت بنستهلك كمية أكبر من الموجودة؛ أنا محتاج 36 جيجا وات كهرباء وأنا عامل حسابي على 33 جيجا".
وتابع: "بنتعرض لكمية من الشائعات والاكاذيب اللي وصلت لكل القطاعات؛ احنا معترفين أن في مشكلة في الكهرباء ولكن المشكلة دي لها أسبابها ومش عندنا؛ في ألمانيا مفيش تكييفات لا في مطارات ولا قطاعات والعالم كله بيعاني".
وواصل: "احنا بنوزع الاحمال وكنا عاملين حسابنا لدة ولكن فوجئنا باستمرار الأزمة والأرصاد قالت إن درجة الحرارة في شهر أغسطس هتكون فوق الـ35؛ كأن مطلوب نهد البلد؛ ياجماعة كل الناس بتعاني وأنا بتتقطع عني وعن بيتي ساعة أو ساعة ونص ومفيش حد مبتتقطعش عنه الكهرباء ولكن خلينا نصبر ونعدي الأزمة".
وأكمل: "الحكومة مش مسؤولة عن الأزمة حصل طارئ بنحاول نتعامل معاه وعندنا أزمة في العملة الصعبة مش قادرين؛ القمح ارتفع 30% والنفط زاد 10 دولار والدولة بتحاول بكل ما تملك أنها تقف على رجليها ومحدش عايز الفشل زي البهوات اللي بيقولوا إن الفنادق التاريخية خدتها شركات من خارج مصر".
وأوضح: "اللي خدت الفنادق شركة طلعت مصطفى شؤكة وطنية مصرية؛ واتأسست شركة رأس مالها 8 مليار ولما نزل التصنيف بتاعنا كله ركز على مصر؛ 23 دولة نزل التصنيف بتاعها من بينهم إنجلترا ومحدش جاب سيرة؛ ماذا تريدون من هذا البلد؛ مؤامرة من الخارج ومؤامرات من الداخل".
واختتم: "البلد دي هتقف على رجليها ومؤسسات الدولة قوية وهناك التفاف حول القيادة السياسية حتى مع زعل الناس من الأسعار أوعوا تفتكروا أن الفرصة جاتلكم عشان تيجوا تاني وتتأمروا على البلد؛ لا أنسوا الناس منسيتش الدم اللي في الشوارع ولا حرق المؤسسات".
