عزة مصطفى لنقيب الموسيقيين: "مقاطعتك ليا مش هتخسرني كتير"
ردت الإعلامية عزة مصطفى مقدمة برنامج "صالة التحرير" المذاع على قناة "صدى البلد" على رفض الفنان مصطفى كامل نقيب الموسيقيين التعامل مع البرنامج.
وقالت مصطفى ردا على قرار نقيب الموسيقيين: "الحفلة هتتعمل بعد بكرة ولغاية دلوقت مش معروف هتتعمل والا لا؛ بتكلم على حفل مغني الراب الأمريكي ترافيس سكوت واللي وصل مصر خلال الأيام اللي فاتت وكنا عايزين نتابع ونقول لحضراتكم الحفلة هتتعمل والا لا".
وأضافت: "تواصلنا مع الأستاذ محمد عبد الله؛ المتحدث باسم نقابة الموسيقيين؛ عشان نعرف الحفلة هتقام والا مش هتقام؛ المفروض لو هتتعمل هتكون في منطقة الاهرامات يوم الجمعة اللي جاية وكان الرد من الأستاذ محمد وقال إن الفنان مصطفى كامل نقيب الموسيقين مقاطع برنامج صالة التحرير ومانع التعامل مع عزة مصطفى؛ ليه؟ متوقفتش ليه أوي لأن هو حر عايز يتعامل معايا أو طرف من النقابة يرد علينا هو حر".
وتابعت: "عايزة أقول للفنان مصطفى كامل خد بالك من تصريحاتك الأعلامية شوية؛ تصريحاتك الإعلامية محتاجة مراجعة كبيرة ولازم تفتكر أن اللي قعد على كرسي النقابة قعد عليه السيدة أم كلثوم؛ النقابة عريقة وقعد على الكرسي السيدة ام كلثوم وموسيقار محمد عبد الوهاب والموسيقار حسن أبو السعود والنجم الكبير هاني شاكر".
وأوضحت: "بطالبك بمراجعة تصريحاتك اللي فاتت كلها؛ هل محتاجة إعادة نظر والا لا؛ أنا مش بتكلم عن نفسي لأني عايزة أقول لحضرتك مقاطعتك ليا مش هتخسرني كتير؛ أنا قولت أقولك شكرا ياسيادة النقيب والناس تبقي عارفة على الهواء رد الأستاذ محمد عبد الله علينا".
وأثار حفل مطرب الراب الأمريكي ترافيس سكوت كثير من الجدل في ظل عدم صدور قرار نهائي بإقامة الحفل من عدمه.
وطالب عدد كبير من رواد التواصل الاجتماعي الجهات المختصة بإلغاء الحفل في ظل الشبهات التي تلاحق المطرب الأمريكي بالتعاون مع الماسونية العالمية وأن هناك اعمال منافية للأداب وتعاطي للمخدرات دائما ما يحدث في حفلاته.
ولم يصدر قرار رسمي من الجهات المختصة حتى الان حول الحفل؛ فيما أشارت نقابة الموسيقيين أن قرارها بالموافقة على الحفل مرهونا بموافقة الجهات الأمنية.
