أحمد موسى: "حسين الشحات بيتقطع من يوم ما سجل جولين في الزمالك"
علق الإعلامي أحمد موسى؛ على واقعة اعتداء حسين الشحات لاعب الأهلي على لاعب بيراميدز محمد الشيبي خلال مباراة الفريقين بالدوري.
وقال موسى خلال برنامج "على مسؤوليتي" المذاع على قناة "صدى البلد": "مفيش حد فوق وحد تحت؛ مفيش حد هنا أطبطب وحد تاني أضايقه؛ بيحصل تدليس في بعض الاعلام الرياضي أه؛ أنا ليل ونهار بلاقي ناس بيطلعوا في بعض وسائل الاعلام بيتكلموا عني معندهمش إلا أحمد موسى طيب أنت حاطط أحمد موسى في دماغك ليه؟".
وأضاف: "عايزني يعني أتكلم عندك وأعبرك؟ أنت صفر؛ اذا كان في تنظيم بجماعته بقنواته الإعلامية بيشتغل بقاله 10 سنين وقبله 30 سنة كمان؛ حركوا حاجة وأثروا فينا؟ أبدا؛ هل طلعت في يوم اسأت لأي حد أو تكلمت عن أي حد أبدا؛ أنا عمري ما أحط الأمور الشخصية خالص لأن دة برنامج لكل الناس".
وتابع: "ضبط المنظومة هي فين المنظومة اللي انضبطت؟ تاني بقول المسطرة محتاجينها؛ حسين الشحات أخطأ نعم أولا أنت بتلعب في النادي الأهلي؛ حسين الشحات أمبارح مفيش أي شي يخليه يخرج عن شعوره حسين الشحات قال إنه حصل إساءة لأسرته".
وواصل: "من المرات القليلة اللي ألاقي حسين الشحات بيخرج عن شعوره رغم أنه طول الماتش بينضرب؛ من يوم ما سجل جولين في الزمالك وهو بيتقطع؛ واللي حصل امبارح غير طبيعي أنه يصدر عن حسين الشحات وغير معروف عنه أنه لاعب عنيف".
وأوضح: "حسين لاعب مهم جدا في النادي الأهلي وحسين تم عقابة من رابطة الأندية المحترفة بمباراتين و20 ألف جنيه؛ الرابطة هنا تقولها شكرا أنك أخدتي اجراء عاجل؛ ولكن لازم تتحرك على الإجراءات السابقة واللاحقة ".
واختتم: "مسألة الكيل بمكيالين مسألة صعبة؛ لا نعرفها ولما ألاقيها هتكلم عنها؛ مفيش على راسنا بطحة ولن يكون؛ أتمنى من مسؤولي نادي بيراميدز المحترمين يا جماعة الهدوء؛ لازم الأهلي مع بيراميدز نهدي الدنيا عشان نعرف مين اللي عايز يشعلل الموضوع هل دول جمهور مصر أو جمهور أجنبي؛ في حالة تسخين غير طبيعية في ناس بيدخلوا يسخنوا بشكل غير طبيعي؛ لازم اخماد النيران ودا دورنا كلنا".
