عمرو أديب يعلق على بيان الكهرباء ويكشف المتسبب في أزمة تخفيف الأحمال
علق الإعلامي عمرو أديب؛ على بيان وزارة الكهرباء الأخير بشأن تخفيف الأحمال، مشيرا إلى أن هناك أكثر من شكل يمكن فهم البيان من خلاله.
وقال أديب خلال برنامج "الحكاية" المذاع على قناة "أم بي سي مصر": "فهمي أنا إيه وأرجو أن حد من الكهربا يتصل يقولنا فهمنا صح والا لا؛ أنا بقول إن الكهربا بتقولنا إنه بعد الساعة 12 هيبتدي نظام جديد في قطع الكهربا وهيبقي عبارة عن ساعة واحدة قبليها بعشر دقائق وبعديها بعشر دقائق".
وأضاف: "يعني بعد الكهربا تقطع أعرف أن قدامك ساعة وتلت وهما مشكورين بيقولوا للناس طبعا محدش يستخدم الأسانسير من قبليها بعشر دقائق هقطع وبعديها بعشر دقائق".
وتابع: "هو بيقول أنه بعد الساعة 12 ودي معلومات من وزارة الكهرباء؛ معلوماتي أن كان في اجتماع كبير في وزارة الكهربا النهاردة ويبدو أن عندهم حاجة لانتظام إعادة الكهرباء في مصر".
وواصل: "في ناس تانية فهمت قالت إن الكهرباء من بعد الساعة 12 كل ساعة ممكن تتقطع في حتة عشر دقائق قبل وبعد؛ أنا اللي فهمته أنهم هيطبقوا النظام وبيقولوا إن قطع الكهرباء لن يزيد عن ساعة وعشر دقائق قبل وبعد".
وأكمل: "هل اللي أنا فهمته صحيح والا لا؟ معرفش لأن مفيش مع البيان صيغة تنفيذية او شرحية؛ أمر اخر مقالتوش الكهربا ولا الحكومة ولما بيقول كدة دة معناه أنه هيكون سيستم؛ رئيس الوزراء بيقول أنه هينتهي منتصف الأسبوع دة طيب أنت بتقولنا السستم دة ليه؟".
وأوضح: "في ناس بتقول إن الأزمة هتنتهي يوم الاتنين والتلات ولكن رئيس الوزراء قال في نص الأسبوع؛ كلام السيد وزير الكهرباء كان واضح عندنا نقص في الوقود وعلى الجانب الاخر الاخوة في البترول أنا فهمت أن الغاز اللي عندهم دة ليه لازمة وهيروح حته والغاز دة بتاع ناس".
وذكر: "مفيش وقود؛ الوقود عند وزير البترول وأنا مش شايف أن وزير الكهرباء غلطان أو وزير البترول غلطان؛ الغلطان هو التنسيق؛ في حد بينسق بينهم إلا إذا أنت محتاج تصدر غاز عشان عايز الفلوس وقولونا كدة أنما متقولوش لحد أنه خلاص هنخلص".
واختتم: "وزير الكهرباء بيقول عندنا محطات بجودة عالمية؛ أنت لو عندك عربية عالمية ومفيهاش بنزين؛ دا الوضع اللي عندنا؛ حصل نقص في الطاقة لأن عندك تعاقدات تصدير غاز ومعندش فلوس تجيب المازوت اللي بيشغل المحطات؛ البيان ناقصه شهر؛ أحنا هنفضل نعمل الموضوع دة لغاية كذا؛ أنا في تقديري إن الوزارة الموجودة دي من أسوأ حظوظ الوزارات في العصر الحديث".
