عمرو أديب عن انقطاع الكهرباء: "يا جماعة قولوا للناس إيه الحكاية"

أكد الإعلامي عمرو أديب؛ أن هناك أمر غير مفهوم في مسألة الانقطاع المتكرر للتيار الكهربائي مطالبا الحكومة بشرح الحقيقة للمواطنين.

وقال أديب خلال برنامج "الحكاية" المذاع على قناة "أم بي سي مصر": "المصريين بيشدوا في شعرهم جدا عندهم حاجتين واثقين فيها الغاز والكهرباء؛ عندنا محطات كهرباء وإحنا دولة مصدرة للغاز".

وأضاف: "بيقولك وزارة البترول محطات الغاز للتصدير لأن وجوده في السوق المحلي بسعر والتصدير بسعر أخر ولكن وزير البترول بيقول أنا بقالي 3 أشهر مصدرتش؛ في ألغاز في موضوع الغاز".

وتابع: "لو سمحتم قولوا للناس لو النور مش هيرجع الأسبوع الجاي؟ أيه اللي هيتغير الأسبوع الجاي؟ درجات الحرارة الأسبوع القادم زي الأسبوع اللي فات وقد تكون أسوأ".

وأوضح: "ليه مفيش غاز؟ عظيمة محطات الكهرباء؟ ولكن محطات الغاز بدون غاز ألغاز؛ رئيس الوزراء تصدى للموضوع وطبقا لوزارة الكهرباء بيقولك مفيش تخفيف أحمال في منتصف الأسبوع الجاي".

وواصل: "أنا أفهم أن دة عرض جانبي من اعراض الازمة الاقتصادية قولوا للناس الحقيقة يا جماعة الموضوع فيه مشكلة؛ الموجود عند المصريين غير ألم الحر سيبك من المراوح والتكيفات في بيوت بأسانسيرات وفي بيوت الماية مبتطلعش فيها ألا بالكهرباء".

وأكمل: "قولوا للناس الحقيقة؛ هو هيحصل ايه لما يقول واحد الحقيقة؛ أنا أسف أنا بعتذر لحضراتكم عن الألم اللي في عز الصيف والوضع واحد اتنين تلاتة؛ بقالنا تلات أربع أيام تسأل دة يقولك كل دة".

وأكمل: "الناس واقفة عند النتيجة والفكرة أن هذا الشعب قد تحمل السنوات الماضية من أجل وجود منظومة كهربائية سليمة؛ الناس في الصعيد بتتكلم عن ست أو سبع ساعات؛ محدش فاهم حاجة ودائما تلاقي استخدام تعبيرات؛ ويقولك انخفاض ضغط الغاز وهو مش عايز يقولك مفيش غاز عشان ميزعلش زميله في وزارة البترول".

وذكر: "قطع النور ليس سرا متقدرش تخبيه؛ النور مفهوم أن دة بيحصل بالطريقة دي يا جماعة قولوا للناس ايه الحكاية هنبقى كويسين يوم ايه ويبقي عندنا كهرباء عادي يوم ايه".

وشهدت البلاد خلال الفترة الماضية تكرار في انقطاع التيار الكهربائي في أغلب مناطق الجمهورية وهو ما أثار الجدل بين المواطنين خاصة وأن البلاد تمتلك منظومة جيدة من المحطات الكهربائية وفائض في الإنتاج.