عمرو أديب: الإثيوبيون نجحوا في المماطلة بمفاوضات سد النهضة
علق الإعلامي عمرو أديب؛ على زيارة رئيس الوزراء الإثيوبي أبي أحمد إلى القاهرة ولقائه الرئيس عبد الفتاح السيسي.
وقال أديب خلال برنامج "الحكاية" المذاع على قناة "أم بي سي مصر": "لسان حال المصريين في حالة دهشة؛ الناس مندهشة الراجل دة عدو والا حبيب؟ الراجل دة الموجود في العاصمة الإدارية والتعامل معاه بالحفاوة والصداقة؛ من يومين قال إنه هيحرص على عدم الحاق ضرر بمصر والسودان في الملء الرابع".
وأضاف: "بيتكلموا عن الملء الرابع اللي يوازي كمية الماية اللي اتملت من أول ما بدأوا يملوا؛ بيقولوا أنه هيملي على فترات بعيدة عشان مصر والسودان مينضروش؛ أنا متابع الموضوع دة من سنوات طويلة؛ كلمة إثيوبيا لم تكن ذات تنفيذ؛ هل المردي ينفذ؟ الكلام أنه هيدخل في مفاوضات".
وتابع: "المفاوضات على ما نخلص يكون هو خلص؛ دي المرة الـ 15 وأنا بكلمكم بصراحة؛ هما بصراحة نجحوا أوي في الحكاية دي يدخلوا المفاوضات ويقعدوا ولأخر لحظة يقولوا خلاص ونمضي وبعدين يقولك الجانب المصري متعنت".
وواصل: "أهم ملف في كل الملفات هو ملف سد النهضة بدون مواربة وخلاص كل المصريين عارفين المشكلة والسد اتملى ازاي وعندهم كام توربين؛ تقديري الراجل دة وهو بيلف في العاصمة الإدارية وبيشوف حجم البناء والزراعة في دماغه سؤال أنتوا جايبين الماية دي منين؟ أنتوا عايشين ازاي طيب مانتوا كويسين وحلوين أهو ايه الحكاية".
وأوضح: "هل جدت في الأمور أمور؟ كل مرة نقول كدة ثم لا يحدث شيء؛ هما بصراحة نجحوا على مدى السنين أنهم يمدوا في الوقت؛ مد ثم ملء وأنت بتحاول تبقى معاهم بكل السبل الدبلوماسية والسياسية ورأيي أن الاستقبال المصري يندرج تحت هذا الأمر الطرق الدبلوماسية وتقدير حسن النية اللي مش موجود عندنا كمواطنين".
وأوضح: "نرجوا أن الأمر يكون فتحة خير؛ يكون أفلحوا أن صدقوا ومن الحاجات الإلهية أن أنت كدة كدة كنت عايز تمد الملء وهو اتمد لوحدة ومن ضمن المفاوضات كان أنك تملى على سبع سنين بدل تلاتة وربك عمل كدة".
واختتم: "الكام سنة اللي فاتوا كمية الأمطار اللي نازلة في اثيوبيا كانت عالية وكانوا بيضطروا يفتحوا البوابات عشان يصرفوا المياه ولكن مصر بتتفاوض عشان أيام غير ذي زرع".
