عمرو أديب تعليقا على عزل مرتضى: "مستمر في النادي.. إيه لازمة القانون؟"
طالب الإعلامي عمرو أديب؛ بمنع التحايل على حكم محكمة القضاء الإداري والقاضي بتأييد عزل مرتضى منصور من منصبه في نادي الزمالك.
وقال أديب خلال برنامج "الحكاية" المذاع على قناة "أم بي سي مصر": "فوجئنا بتصريحات من الوزارة تقول أحنا قولنا عينوا حد قائم بأعمال رئيس النادي ودا هيفرق أيه عن المرة اللي فاتت؟ أنا عايز اسأل سؤال أنتوا عايزين العدل ولا شبه العدل؛ الدول اللي بتستخدم العدل هي اللي بتتقدم؛ أنتوا عايزين أنه اتعزل ولا أنه شبه اتعزل؟".
وأضاف: "أنت بتقول للناس في مصر أن الأحكام لا يتم تنفيذها حضرة القاضي يقول العدل ولكن تنفيذ العدل يقول أيه؟ اللي بيقوله القاضي هو العدل للمرة التانية ونهائيا؛ المفروض الأولى كانت النهائية وجات المحكمة النهاردة قالت تأييد عزل مرتضى منصور".
وتابع: "أنتوا تاعبين نفسنا ليه ما تقولولنا عايزين مرتضى منصور رئيس للنادي وخليه قاعد؛ قولولنا يا جماعة أحنا عايزينه هو؛ وزارة الشباب والرياضة تقولنا يا عمرو أحنا عايزينه رئيس النادي لحد الانتخابات الجاية".
وواصل: "هو لا يصلح أنه يكون رئيس للنادي غير لمدة شهرين؟ دي حاجة غير موجودة في أي مكان بالعالم ياجماعة قولنا الراجل دة قدرنا احنا عايزينه كدة باشا هتبقي ايه المشكلة؛ هو قاعد بقاله 20 سنة يشتم أي حد في البلد".
وأوضح: "هو ده النموذج التربوي اللي عايز تحطه على رأس أكبر نوادي مصر؛ أنت بتقول للناس أيه القانون حسب ما نطبقه؛ هناخد الحكم نلففه لفة؛ أحنا في شهر سبعة والشهر الجاي يعود مرتضى منصور تاني فهموني والله؛ مسؤول في الدولة يقولك ياجماعة الراجل ده معزول وبعدين يرجع أصل هنشوف تاني".
وأكمل: "عايز تقولي إن الناس بعد حكم المحكمة الإدارية العليا أن مرتضى مشي؟ لا أهو قاعد في النادي أهو وماسك الحديدة وقالك أتلقى اتصالات من شخصيات في الدولة قالوله لو سمحت خليك في الزمالك حاليا الدولة مش عارفة تعيش؛ اتحداك تقول اسم مسؤول في الدولة كلمك".
واختتم: "هو يحتمي ويقول لا دا وراه الدولة؛ في واحد خلاص يقولوا دا وراه رسمي؛ اليوم اللي اتقال إنه معزول الدولة طبقا لمرتضى منصور قالتله أوعى تمشي من الزمالك؛ الراجل طلع عليه الحكم بالعزل شهرين ويدخل الانتخابات ويكسب تاني لأنه عامل الجمعية العمومية؛ أيه لازمة القضاء والقانون".
