أحمد موسى يحذر من الانسياق خلف الشائعات التي تستهدف القوات المسلحة
حذر الإعلامي أحمد موسى، من الشائعات التي تستهدف القوات المسلحة، قائلا إن اللجان الإلكترونية مستمرة في استهداف المؤسسة العسكرية.
وقال موسى خلال برنامج "على مسؤوليتي" المذاع على قناة "صدى البلد": "أهل الشر مستمرين في الأكاذيب والشائعات وطول الوقت أقول خلي بالكم استمر للشائعات واستهداف المؤسسة العسكرية؛ أي خدش أو خناقة هيقولوا القوات المسلحة؛ تحصل أزمة في الساحل الشمالي يقولك القوات المسلحة".
وأضاف: "اتركوا القوات المسلحة وهي لا تلتف لمثل هذه الأمور فهي لها واجب وطني وهو أمن مصر وأمن الشعب المصري؛ تجد تريندات وهاشتاجات ولجان الكترونية شغالة ضد الجيش".
وتابع: "خلي بالك هو ده الاستهداف؛ قالك الساحل الشمالي مش عارف حصل ايه ودخلوا الجيش؛ ولسه كنا بنتكلم على الجريمة اللي حصلت في مدينتي وتم إحالة المتهم في الجريمة إلى محكمة الجنايات العسكرية والاحالة عاجلة في ظرف أسبوع".
وأكمل: "بيان المتحدث العسكري قال إن التهمتين القتل العمد والشروع في القتل وأنا بقول لحضراتكم التهمتين دول عقوبتهم الإعدام؛ المحاكمة عاجلة وقلنا من الأسبوع اللي فات والقوات المسلحة اجراءتها سريعة جدا وهتشوف المحكمة هتاخد وقت قد ايه والمحامي هيبقي موجود والمتهم هياخد حقوقه كاملة".
وأوضح: "المتهم لم يعد ضابط وأصبح متهم؛ الكاذبون بتوع الإرهاب الاخواني اللي بيشتغلوا حملات ضد القوات المسلحة قالوا دي جنحة وهياخد براءة؛ أدى جناية والتهمة الموجودة حدها الأدنى المؤبد ولكن في ظرف مشدد وعقوبتها تصل للإعدام".
وواصل: "القوات المسلحة هتفضل مستهدفة وعايز يشكك في جيشك ويعمل وقيعه بينك وبين جيشك العظيم ودا دورهم؛ ومش هيبطلوا؛ واقعة في الساحل الشمالي أيه اللي حصل؟ جايبين اسم هشام طلعت مصطفى وقالك إنه خد الناس وهدوا حاجات وكتبوا أسماء ناس تانية وطلعوا كانوا مسافرين برة".
واختتم: "في استهداف واختلقوا وقائع بتقول إن خناقة حصلت وقالوا هشام طلعت مصطفي؛ وهو طلع وقال لست طرف في الأحداث ولم أسافر للساحل منذ أسبوع؛ يا جماعة كل حد عنده أزمة هل الناس تفضل تروج اتهامات؟ أي حد عنده واقعة أو مشكلة عندك جهات التحقيق والعدالة".
