عمرو أديب مندهشا: "هي الدولة بتطعن على عزل مرتضى منصور ليه؟"
علق الإعلامي عمرو أديب، على استمرار التقاضي أمام المحاكم في قضية عزل رئيس نادي الزمالك مرتضى منصور.
وقال أديب خلال برنامج "الحكاية" المذاع على قناة "أم بي سي مصر": "كل يوم في قضية منظورة أمام القضاء بإلغاء عزل رئيس نادي الزمالك؛ هي القضية كدة أنه القضية موجودة وكل يوم بتتأجل وطبعا رئيس الزمالك مش معزول؛ يعني هو اتعزل بس موجود بيمارس صلاحياته وفي النادي وبيجيب لاعيبة ويمشي لاعيبة".
وأضاف: "أنا مش واقف قدام الموضوع ده زي ما تحبوا يعني أو زي ما حد يحب يعني مش دي القضية؛ أنا عندي سؤال واحد ملوش إجابة وسألت ناس كتير وسألت الجهات المعنية هي ليه الدولة المصرية ممثلة في وزارة الشباب والرياضة رافعة قضية لإلغاء عزل رئيس نادي الزمالك".
وتابع: "أصل هو عزله من عدمه خلال ملوش حاجة هو الراجل موجود وبيمارس عمله؛ هذا القرار بتاع المحكمة مش بيفرق في الوضع الموجود؛ كان في قرار من المحكمة بالعزل واتنفذ يومين؛ هي ليه الدولة هي اللي عاملة طعن في عزل رئيس نادي الزمالك وسالت وزارة الشباب والرياضة معندهمش رد وهو الجهة المنوطة؛ هي الجهة اللي بعتت للزمالك وقالتله لو سمحت اعزلوا رئيس النادي".
وأكمل: "لو سألت حد النهاردة وقلت هو مرتضى منصور معزول هيقولك لا مش معزول؛ طيب حكم المحكمة ايه هو الراجل مش معزول؛ طيب القضية اللي معمولة دي ايه؟ هو مش معزول خلاص أمر واقع وأنا موافق معنديش مشكلة أنه يبقي موجود".
وواصل: "الدولة رافعة قضية عشان يلغي عزل مرتضى منصور ليه؟ عمري ما عرفت الإجابة ومش عايز أعرف؛ هو الوضع بالحكم اللي فات أو اللي جاي غير مؤثر في الزمالك؛ مرتضى منصور قاعد لغاية الانتخابات الجاية وهيكسب الانتخابات الجاية وهو لم يرحل ومحدش قاله حاجة؛ أنا مش زعلان ومتفرقش كتير؛ النادي في حالة سيئة جدا بس أفهم حد يقولي ليه الدولة بتطعن في عزل مرتضى منصور؛ مش مرتضى منصور اللي طاعن".
واختتم: "أنا أفهم أن مرتضى منصور يكون طاعن في عزله ولكن اللي تشوفوه يعني؛ من أخر اهتماماتي".
