عمرو أديب يكشف عن تعليق بطرس غالي بعد حصوله على البراءة

علق الإعلامي عمرو أديب؛ على حصول يوسف بطرس غالي؛ وزير المالية الأسبق على البراءة في عدد من القضايا التي كان يحاكم فيها منذ اندلاع ثورة يناير.

وقال أديب خلال برنامج "الحكاية" المذاع على قناة "أم بي سي مصر": "الراجل حياته كانت صعبة وأضطر أن يعمل عشان يعيش؛ هو عنده ايه يوسف بطرس غالي؟ معندوش حاجة وجه وقت حتى ممعاهوش باسبور والراجل كان عايش عيشة ضنك وامبارح تنتهي قضايا يوسف بطرس غالي بالبراءة".

وأضاف: "كلمنا الدكتور يوسف وقال إنه راجع مصر قريب وأنه بقاله 13 سنة برة وبيرتب أموره؛ وهو مواطن عادي لا يشغل أي منصب وأنه سعيد للغاية".

وتابع: "يوسف بطرس غالي براءة والأن يستطيع أن يعود لمصر؛ لما كان يوسف بطرس غالي وزيرا للمالية كنت بسأله في نفس الموضوع بتاع فلوس التأمينات؛ ناس كتير كانت بتقول يوسف بطرس غالي أخد فلوس التأمينات طيب اخدها ازاي؟".

وواصل: "رقم اتنين لو كانت فلوس التأمينات دخلت موازنة الدولة هل الراجل دة كان بيعمل الموضوع دة من دماغة يعني؟ دا لو حصل؛ ياريت حد يكون عنده الجرأة ويدور على الإجابة من 80-90% من الناس اللي اتحاكمت بعد 2011 خدوا براءة طيب يبقي ايه كان الموضوع؟".

وأكمل: "اللي عنده فلوس رجعتله واللي اتقال أنه سرق الدولة خد براءة واللي اتقال كان مسؤول عن ايه واحداث ايه خد براءة؛ يوسف بطرس غالي خد النص مليار بتوع التأمينات ولا لا؟ حد يرد طيب الناس اللي معاها فلوس دي فلوسها صح والا غلط".

وأوضح: "كل الناس خدت براءة طيب كل الناس دي كانت متهمة ليه؟ ايه الحكاية حد عايز يعرف؟ محدش حتى مهتم والنهاردة الحكم بتاع يوسف بطرس غالي يعملك علامة الاستفهام دي؛ هي الفلوس لما اتسحبت الراجل دة متحاسبش ليه؟ هو الراجل دة كان بيسحب الفلوس لوحده؟".

واختتم: "ياعمل غلط فيتحاسب أو معملش يبقي ايه اللي حصل؟ أكتر من 90% من الناس بريئة؛ أرجو بس دا خاطر للتفكير مش عشان حاجة؛ هذا الرجل عقلية اقتصادية محترمة يحترمها الناس في الخارج".

وقضت محكمة جنايات شمال القاهرة بالعباسية، ببراءة يوسف بطرس غالي، وزير المالية الأسبق في قضية إهدار المال العام، كما قضت بانقضاء الدعوى الجنائية في قضية فساد الجمارك للتصالح.