تامر أمين يعلق على واقعة "جزار المونوريل"
علق الإعلامي تامر أمين؛ على الواقعة المعروفة إعلاميا بواقعة "جزار المونوريل" والتي أثارت الجدل خلال إجازة عيد الأضحى المبارك.
وقال أمين خلال برنامج "أخر النهار" المذاع على قناة "النهار": "الاجازة رغم أنها كانت طويلة رغم أنها كانت مكلفة؛ والصرف كان على ودنه؛ ولكن كان في بعض اللقطات كدة حصلت محتاجين نقف عندها عشان نعرف الناس دي بتتصرف كدة ليه؟".
وأضاف: "في لقطة منهم اللي عملت جدل كبير وأنا حسيت أن حد طعني بسكينة في قلبي لما وراني صور الراجل جزار المونوريل؛ اللي قرر يعلق الدبايح على أعمدة المونوريل؛ المونوريل يا ظالم؟ بعيدا عن أنه لسة بيتبني ولسة جديد المصريين بيبصوله أنه هيكون عندنا حاجة زي اللي عند الناس المتقدمة؛ الراجل دة بقي راح دالق علينا ماية باردة فجأة".
وتابع: "أنا شفت الصورة اتنكدت عشان خفت على بكرة؛ باقي المشروعات هتنضرب في مقتل لو ثقافتنا بالشكل دة لو وعينا بالشكل دة؛ المصريين أهم حاجة فيهم الوعي بتاعهم؛ المصري قالك إن العلم في الراس مش في الكراس".
وأكمل: "ازاي وأنت عارف أن العلم في الراس مش في الكراس تروح راشق الأجنة في الكوبري؛ دا لا ليه علاقة بعلم ولا براس ولا بذكاء أنت فاهم أنها هتعدي؟ أديك قضيت العيد في التخشيبه استفدت أيه بقي بالهمبكة بتاعتك؟ المنوريل يا مفتري؟ بالنسبالي اللقطة خطورتها في كدة مش خطورتها في العامود وزارة النقل نزلت وكشفت وقالت إن العامود هندسيا سليم".
وأوضح: "هو احنا بنتعب ونطفح الكوتة والحكومة بتاخد من قوتنا وكلنا شادين الحزام عشان مستنيين بكرة بس أمالنا يبقي حلو لولادنا وأحفادنا وأنهم يعيشوا في العاصمة الإدارية الجديدة والعلمين الجديدة؛ اللي أنا شفته دة معناه أنه يلا نفسي وبس".
وتداولت صور مع تعليقات مستنكرة على منصات التواصل الاجتماعي، يظهر فيها جزار أثناء تعليق اللحوم على أحد أعمدة قطار "المونوريل"، الذي تعمل الدولة على تدشينه حاليا بالقاهرة والجيزة، ويعد مشروعا قوميا في البلاد.
وحررت السلطات المختصة محضر إتلاف ممتلكات عامة غرامته 111 ألف جنيه، ومحضر إشغال طريق، ومحضر ذبح خارج المحل المرخص لذلك، ومحضر إضرار بالبيئة.
