عاجل| "انخفض 11 جنيها".. تراجع كبير في أسعار الأرز
أكد الإعلامي أحمد موسى، أن أسعار الأرز قد شهدت انخفاضا بقيمة 11 جنيها للكيلو، مشيرا إلى أن الأسعار سوف تتراجع أكثر خلال الأيام المقبلة.
وقال موسى خلال برنامج "على مسؤوليتي" المذاع على قناة "صدى البلد": "معندناش أزمة سلع خالص وعندنا احتياطي استراتيجي موجود وكامل ولا أزمات؛ الرز النهاردة نزل 11 جنيه وفي ناس هيبتعولي ويقولك مش صحيح؛ أنا بقولك صحيح".
وأضاف: "كيلو الرز النهاردة 20-22 جنيه؛ كان بـ30-31-33 والنهاردة هتلاقيه 18-19-20 وهينزل ويوصل 15 و13 و10 تاني بقول كدة؛ ليه بقول لحضرتك؟ عشان في كميات والنهاردة اللي عنده مخزون اشترى غالي لازم يطرح والأسعار تبدأ تنزل وهتبدأ تنزل أكتر بعد شهر ونص من النهاردة لأن المحصول الجديد نازل".
وتابع: "أهالينا السنادي في بحري زرعوا السنادي رز كتير؛ زرعوا حاجتين رز وبصل؛ البصل كان بسعر 18 جنيه؛ الرز داخل بعد شهر ونص من النهاردة واللي عنده رز النهاردة لازم يلحق يبعيه أو هيخسر كتير أوي".
وأكمل: "الرز هيوصل 10 جنيهات وأنا بفكرك أهو وحاسبوني على الكلام دة بعد شهر ونص من النهاردة؛ عايز أقول لحضراتكم وأنا سألت أهالينا ايه اللي ناقص عندكم؟ ما شاء الله الحاجة مرطرطة؛ الفاكهة بس يمكن في مشكلة في المانجة".
وتطرق موسى للحديث عن البنية التحتية الخاصة بقطاع النقل في الصعيد مشيرا إلى تطوير طريق الجيش المؤدي إلى أسيوط، مضيفا: "وأنا ماشي على الطريق الصعيد وأنا بحيي هنا الفريق كامل الوزير؛ كنا بنمشي على الطريق الغربي ودا بيزيد المسافة ساعتين؛ كنا بنمشي على الطريق الغربي وبعدين نرجع على طريق الجيش؛ النهاردة الطريق دة أنسى من أول الكريمات ولحد بوابة أسيوط تاخدها في 3 ساعات؛ الطريق ست حارات وحاجة ما شاء الله بس نحافظ على الطريق".
واختتم: "وأنت راكب العربية متحسش بالطريق؛ الطريق عليه حركة ومحطات ومراكز للخدمة وزمان مكانش عندنا؛ النهاردة كل 20-30 كم تلاقي محطات واستراحات وفي شغل واللي عجني كمان وأنا وقفت جنبها عشان أشوف واحنا ماشيين ناحية المنيا كدة يمين الطريق في مساحات ألاف الأفندنة بالعربية كدة 25-30 دقيقة والمساحة دي كلها أتزرعت وبتتزرع؛ والله يوم الوقفة وتاني يوم العيد الناس شغالة في المواقع".
