أحمد موسى يطالب الحكومة بمد الدعم الاستثنائي على بطاقات التموين
ناشد الإعلامي أحمد موسى، الحكومة بمد الدعم المالي الاستثنائي على بطاقات التموين لمدة ستة أشهر أخرى، مشيرا إلى أن هذا الدعم قد ساعد المواطنين الأشد احتياجا في ظل الأزمة الاقتصادية التي تعاني منها البلاد.
وقال موسى خلال برنامج "على مسؤوليتي" المذاع على قناة "صدى البلد": "ليا طلب بسيط وإنساني يهم 36 مليون مواطن؛ الطلب ده من سنة زي الأيام دي الرئيس أعلن دعم مستحق للناس وهي مكرمة ساعدتهم خلال سنة؛ اللي هي 100 جنيه للبطاقة 2 أفراد و200 جنيه لأسرتين و300 جنيه لأربع أسر".
وأضاف: "هذا الأمر توقف امبارح؛ وأنا بصراحة الناس أهلنا لما بشوفهم كلموني عن الحكاية دي وكلموني لأنها ساعدتهم لأنها رايحة للمواطن الأكثر احتياجا؛ الـ 100 جنيه بتفرق معاهم؛ لما لقوا الناس الحكاية وقفت أمبارح قالولي طالب بلسانا أن الحكاية دي تستمر معانا لأخر السنادي؛ خاصة أن الموضوع 900 مليون جنيه بالنسبة لبلدنا ولا حاجة؛ ياما فلوس كتير ومليارات بيتم انفاقها على الناس".
وتابع: "سيادة الرئيس اللي قال الدعم 6 أشهر ولما تعبت الناس أكتر قالك كمان 6 شهور وبالمناسبة الناس لسة تعبانة ولو امتدت كمان ست شهور تبقى مكرمة كبيرة؛ ولما سألت الناس قالولي التموين بيخلص في نص الشهر وبعد الزيادة بقي يوصل لحد 23-25 في الشهر؛ أتمنى الحكاية دي تستمر لصالح الناس؛ الناس يا جماعة محتاجة ده".
وأوضح: "أنا جاي من الصعيد؛ وبنقف في محطة بنزين في المنيا أو أسيوط بيتلموا حواليك ويقولولك؛ بتكلم على رقم 36 مليون مواطن؛ الناس تتمنى أن هذا الكرم من الرئيس عبد الفتاح السيسي تستمر لمدة 6 شهور كمان هما 900 مليون جنيه نقول مليار".
وكان وزير التموين والتجارة الداخلية، الدكتور علي المصيلحي، أعلن انتهاء الدعم الاستثنائي للفئات الأولى بالرعاية البالغ عددهم 35 مليون مواطن رسميا بداية من الأول من يوليو الجاري.
