أحمد موسى: اللي انتخبوا مرسي ارتكبوا جريمة في حق مصر
أكد الإعلامي أحمد موسى أن جماعة الإخوان الإرهابية كانت تستهدف تكوين جهاز شرطة خاص بهم مشيرا إلى أن هذا الأمر كان يمكن أن يؤدي إلى حرب أهلية.
وقال موسى خلال برنامج "على مسؤوليتي" المذاع على قناة "صدى البلد": "الدولة الوحيدة بفضل الله اللي محصلش فيها حرب أهلية مصر؛ ولكن كانت رايحة لده؛ لأن أنت في الاخر هتأمن نفسك وهيحصل ايه؟ الإخوان عصابة عندها سلاح؛ وقالوا هنعمل اللجان الشعبية تكون هي البديل للشرطة".
وأضاف: "كانوا عايزين يعملوا قانون ويبقي عندهم الشرطة بتاعتهم؛ أنا كمواطن عايز أعيش أمن في بلدي؛ ومش عايز حاجة تانية؛ ليه؟ بس احنا الللي عملنا في نفسنا كده مش اتعمل انتخابات؟ أه واتعملت انتخابات برلمانية أه هو مين اللي نزل ووقف انتخب محمد مرسي وعصابته".
وتابع: "والله العظيم يوم الانتخابات الرئاسية لما محمد مرسي فاز؛ كلنا كنا بنقول شفيق اللي جاي؛ أنا شفت ناس لم يكونوا في أي يوم اخوان؛ طلعوا وهتفوا وفضلوا يتكلموا".
وواصل: "الناس دي بعد كدة شافوا الاخوان ومحمد مرسي وبقوا معانا في 30 يونيو؛ طيب أنت نزلت انتخبت محمد مرسي ليه؟ لازم تعرف أنه حصل جريمة في حق مصر؛ اللي انتخبوا مرسي ارتكبوا جريمة في حق مصر ودافعين تمنها لحد النهاردة أو دافعين تمن 2011 إلى 30 يونيو 2013".
وأكمل: "الموضوع مش فلوس دفعنا التمن أرواح وشهداء ومصابين ودم اندفع؛ كان ممكن نبقي بعيد تماما عن كل دة؛ مش بتكلم عن فلوس ومليارات الدولارات خساير مصر ولكن في الأهم من دة حياة ابطال استشهدوا".
وذكر: "قالك عايزين نمشي المشير طنطاوي نعمل ايه؟ يروح عامل مذبحة رفح الأولى ونمشي المشير وارتكبوا جرائم عشان ينفذوا اللي جواهم ضد مؤسسات الدولة المصرية؛ هو مين اللي كان بيشتم القوات المسلحة؟ مش كانوا بيوجهوا اتهامات للجيش لحد ما المجلس الأعلى للقوات المسلحة عملوا اجتماع مع مرسي وأبلغوه بالإساءات للقوات المسلحة".
واختتم: "فاكرين التحرير كان شكله ايه؟ ودلوقت التحرير شكله ايه؟ كل حاجة اتغيرت للانضف والأحسن؛ هما عملوا حشد في رابعة والنهضة ولكن لو كانت معاك ناس كنت كملت؛ المصري اللي خرج بإرادته الحرة في التحرير وفي كل حته؛ والثورة من مميزاتها السلمية ومفيش حادثة حصلت".
