أحمد موسى يعلق على انهيار عمارة الإسكندرية: "مين المسؤول عن اللي حصل؟"
علق الإعلامي أحمد موسى؛ على انهيار عمارة مكونة من 14 طابقا في منطقة سيدي بشر بالإسكندرية مشيرا إلى أن أعداد الضحايا غير معلومة حتى الأن.
وقال موسى خلال برنامج "على مسؤوليتي" المذاع على قناة "صدى البلد": "عمارة النهاردة 13-14 دور انهارت الناس بتتكلم على اعداد موجودة داخل العمارة وتحت الأنقاض وفي أسر بتتكلم عن ولادهم".
وأضاف: "بنشوف ايه اللي حصل النهاردة وبنتكلم عن الصبح؛ لما بنتكلم عن تمانية الصبح في إسكندرية الناس بتبقي صيف واجازات؛ العمارة دي ممكن شهور السنة تبقى فاضية ولكن وقت الصيف أديكو شايفين البحر".
وتابع: "الناس جريت وربنا سلمهم ويسلم الجميع وعدد كبير من العربيات أدمرت؛ الساعة تمانية صباح اليوم تنهار العمارة في حي سيدي بشر وفي أسر بتتكلم عن أن لها أربع شباب موجودين في الشقة وبيدوروا عليهم واحدة تانية بتكلم عن اتنين؛ محدش عارف الاعداد".
وأوضح: "هل العمارة دي كان فيها سكان أو مفيش؛ أطراف أخرى بتتكلم أن كان في سودانيين ومصريين وغيرهم؛ محدش عنده حقيقة للأسف حتى هذه اللحظة محدش عنده معلومة؛ هل وارد ربنا يسلم الجميع لا عايزين حد يموت أو يصاب".
وأكمل: "حصل أن العمارة انهارت؛ اسكندرية واحدة من أكبر المحافظات في مصر اللي عندهم مخالفات في المباني وتقريبا رقم واحد يمكن لحد السنتين اللي فاتوا وكان في أحد اللقاءات مع السيد الرئيس واللواء محمود شعراوي كان وزير التنمية المحلية كانت بيتكلم عن 133 ألف مخالفة مباني في الإسكندرية بنتكلم عن أرقام هائلة".
وذكر: "الرقم دة صدر له قرارات إزالة؟ كام واحد اتنفذ كام اجراء اتعمل؟ الناس جريت وتحت العمارة في قهوة وسوبر ماركت ومحلات؛ من السبب في انهيار العمارة؟ وطلع محافظ الإسكندرية قال حدث انشطار نصف العمارة دي".
وأوضح: "لما بيحصل حاجة زي كدة لازم ترجع تسمع القصص وتتكلم عن مين المسؤول ومين اللي يتحاسب وليه معملناش إجراءات؟ عشرات التساؤلات ويفضل كدة دة وطبعا يقولك نتيجة للظروف اللي فيها وبعدين حتى لما تيجي تزيل يقولك الحقوا ومشوا الناس من بيوتهم".
واختتم: "امشيه من بيته والا اسيبه يموت؛ صادر قرار إزالة للدور الأخير من العمارة هل نفذا الإجابة لا؛ مين المسؤول عن التنفيذ؟ لما بيحصل حاجة زي كدة الجميع يتساءل ما الذي جرى؟".
