عمرو أديب عن تمرد فاجنر: الدولة لها جيش واحد.. لو اتنين تغرق
علق الإعلامي عمرو أديب؛ على تمرد قائد قوات مجموعة فاجنر الروسية على الجيش الروسي، مشيرا إلى الانباء المتتالية عن إمكانية اقتحام مقاتلي المجموعة للعاصمة الروسية.
وقال أديب خلال برنامج "الحكاية" المذاع على قناة "أم بي سي مصر": "من الصبح بتسمعوا كلام محترم من المحطات عن اللي بيحصل في روسيا؛ فاجنر وبوتين والتمرد؛ أنا لن أضيف شيء ولن أدعي أن عندي معلومة زيادة أنا هجيب منين؟".
وأضاف: "أرجوكم خدوني على قد عقلي أنا عايز اسأل سؤال بسيط؛ أنا بتكلم بمنطق خيالي أنا لا استند إلى أي شيء عظيم؛ أما تكون دي الدولة التانية في العالم في التسليح وجهاز المخابرات بتاعها واحد أو اتنين أو تلاتة ورئيس الدولة كان قائد الجهاز وعندهم الطيارات والمدافع والصواريخ"، متابعًا: "لو الدولة فيها جيشين تغرق".
وتابع: "عايز تقولي إن الكام ساعة اللي فاتو دول موسكو كانت هتسقط؟ أنت هتقولي أن قوات فاجنر كانت على بعد 200 كيلو من موسكو والراجل كان داخل يجب بوتين من القصر؟ دا لو البوليس الروسي طلع هيقضى على فاجنر".
وأوضح: "هل أنت كنت مضطر تنفي أن بوتين؛ الحج بوتين شخصيا تنفي أنه مجريش من المكتب بتاعه عشان في 5 ألاف واحد جايين على موسكو؛ تسمع البي بي سي والسي أن أن خلاص على مشارف موسكو هيروح يجيبه من دماغه ويغير نظام الحكم وابتدوا يعملوا تحليلات وأن لو بوتين مشي".
وذكر: "الراجل دة كان طباخ بوتين وقوام قواته كلها قايم نايم 25 ألف عسكري هيوقع موسكو؟ الجيش الروسي ملايين؛ في ضابط مخابرات اترقي النهاردة من مقدم للواء؛ لأنه عمل العملية زي ماهي مطلوبة منه اللي هو أنا عايز كذا كذا هننكد عليه بشكل غير طبيعي أتفضل؛ أو من الناحية التانية لو سمحت عايزين بس نعمل حاجة كدة عشان عايزين نكشف شوية حاجات حوالينا".
واختتم: "بيتعمل كدة في السوشيال ميديا بيبقي في دول عايزة تعرف المعارضين بتوعها؛ فيعمل موقع ويشتم ويدخل الناس كلها اللي بتشتم معاه فيلمهم ويبقي عارف مين اللي معاه؛ النهاردة ميدفيدف بيقول ياجماعة لازم العالم يعرف مخاطر أن السلاح النووي يقع في أيد المتمردين؛ يانهار أسود هو كان السلاح النووي هيقع في أيد المتمردين؟".
