إلهام شاهين: "كنت واثقة أن الأخوان مش هيكملوا"

كشفت الفنانة إلهام شاهين؛ تفاصيل مشاركتها في ثورة 30 يونيو والتي أطاحت بحكم جماعة الإخوان الإرهابية عام 2013.

وقالت شاهين في مداخلة هاتفية مع برنامج "صالة التحرير" المذاع على قناة "صدى البلد": "قبل 30 يونيو كنت من حزب الكنبة ولكن كنت نشطة إعلاميا وبقول رأيي وموجودة؛ كنا خايفين على بلدنا وحاسيين أنها هتضيع مننا".

وأضافت: "احنا اكتشفنا الاخوان وكان في ناس غصب عنهم مصدقينهم أنهم ناس بيراعوا ربنا والحقيقة أنه لا ظهرت حقيقتهم ومش تدين ولكن متاجرة بالدين؛ بيلعبوا على عواطف الناس وعارفين أن الدين مهم جدا في حياة الشعوب".

وتابعت: "احنا شفنا التعذيب اللي عملوه والقتل؛ دي ناس لا هما متدينين ولا هما وطنيين؛ المرشد بتاعهم بيقول ما الوطن إلا حفنة تراب؛ هو معندوش انتماء لمصر ودي كارثة؛ اللي معندوش انتماء ممكن يبيع الوطن؛ اللي جالنا رئيس من الاخوان كان محبوس في قضية جاسوسية".

وأوضحت: "خيالي رافض يتخيل سيناريو استمرار الاخوان؛ حياتنا كانت هتبقي زي مسلسل بطلوع الروح؛ أنا كنت واثقة وقلتها في برنامج أنهم مش هيكملوا سنة في مصر وأنا قلت إني واثقة في الشعب المصري ورفضه للأشياء الغلط؛ دي ناس بتكره كل شيء جميل".

وأكملت: "الناس دي كدابين والكدب دة أكبر الموبقات في الإسلام؛ أنا اتهددت كتير ومرة عملوا مليونية الخلاص من الهام شاهين وجم تحت البيت فعلا يوم الجمعة وبدأوا يرفعوا صور ليا مزورة والأمن حذرني ولكن محصلش حاجة يعني كان في 200 عيل ومنهم ومشيوا أخر اليوم".

وواصلت: "كانوا بيكتبوا ألفاظ على العمارات؛ والراجل الشيخ اللي كان بيطلع في القناة بتعاتهم وأنا قفلتها ليهم بالقانون؛ الدين الحقيقي أخلاق قبل أي شيء؛ فين الاخلاق اللي عما وريهولنا؟ أحنا لا سلمنا من أيديكم ولا من ألسنتكم؟ أي اسلام اللي عندكم".

واختتمت: "كانوا بيقولوا ألفاظ على الأستاذ نجيب محفوظ؛ أنا سجلت كل الشتايم اللي اتقالت على كل المثقفين والكتاب والفنانين وقلت هدافع عن كل يوم في قضيتي؛ والقضاء حكم على الراجل اللي زورلي صور وحكم باغلاق القناة لمدة ستة أشهر؛ لم تغلق قناة في تاريخ التلفزيونات في العالم بحكم محكمة ألا قناة الحافظ".