مروة نصر: شيرين عبدالوهاب جوازتها سودا وأحمد سعد دمه خفيف
الوسط الفني عبارة عن شلل ولا يحبون بعضهم.. ويجز في حتة تانية لوحده
مش بغير لون شعري وبحب ألبس الإسدال.. أنا عصبية وكان نفسي أبقى دكتورة
تحدثت المطربة مروة نصر، عن المطربة شيرين عبد الوهاب وزواجها من المطرب حسام حبيب.
وقالت خلال لقائها في برنامج "سبوت لايت" تقديم الإعلامية شيرين سليمان على قناة "صدى البلد": "دي جوازة سودا على الوطن العربي كله، وأنا اتكلمت من حبي فيها وأني من جمهورها، ومستحيل أقيمها كمطربة".
ووجهت رسالة للمطربة شيرين عبد الوهاب قائلة: "ربنا مديكي حاجات حلوة كتير أوي.. دم خفيف وصوت حلو وكل حاجة تقول انك نجمة بس".
وتابعت: "شيرين أوقات بتستخدم عفويتها فالناس بتستخدم ده، والفنان لازم ينتقي كلماته في الإعلام أو ما يتكلمش، ولحد النهاردة اللي مخلي عمرو دياب نجم كبير أنه مش بيتكلم في الإعلام، وده ذكاء خارق وليس غرور، وهو عارف أنه عنده رسالة، وعمره ما اتقال أنه شتم فلان".
واستكملت مروة نصر: "شيرين قدوة لبنات كتير أوي، ولو بنات شافتك بتحلقي شعري أنا كـ أم وبنتي بتحبك وشافتك تعمل إيه؟، طبعا انتي حره في حياتك ولكن لا تشاركي الجمهور، ومينفعش أدخل أهلي في مشاكل مع الناس وهي عندها بنتين زي القمر".
وأضافت مروة نصر لبرنامج "سبوت لايت": شيرين عشان نجمة كبيرة الناس بتعديلها، ولكن لو نجمة صغيرة الناس هتمسكلها على الواحدة، وأنا غنيت معاها في ستار أكاديمي وكانت عرفاني قبل البرنامج ده، وكل ترينداتها اللي فاتت كانت استعطاف.
كما كشفت المطربة مروة نصر، تفاصيل علاقتها بالمطرب أحمد سعد، وذكريات معهد الموسيقى مع زملائها الفنانين.
وقالت: "دفعتي كانوا أكبر مني كلهم وكانوا شاطرين جدا في المزيكا ومنهم محمد نور ورامي صبري وأحمد سعد، وكان كلهم أولاد وعارفين بعض".
وتابعت: لما كنا بنطلع رحلة لازم أحمد سعد يكون موجود معانا في الرحلة دي، وعلى مدار أجيال كان معروف أنه أخف دم في المعهد.
أردفت: "أحمد سعد مطرب عظيم وفي بداياته كان معروف أنه أخف دم بلا استثناء، وكمان حمادة الحلو ابن الفنان محمد الحلو ودياب، وكانوا جروب مع بعض من أيام المعهد وكل واحد فيهم ليه شكل معين وبيغني بشكل معين".
كشفت مروة نصر، عن آخر أعمالها الفنية التي من المقرر طرحها في السوق، وسبب اختفائها إعلاميا خلال الفترة الماضية، وقالت إنها انتهت من تصوير أغنية "بيني وبينه راحة وتلاقي"، كما أنها تصور الآن أغنية "حلوة السهرة، وأنا خايفة"، إلا أنها تخشى من طرح الأغاني خلال الفترة المقبلة.
وأوضحت مروة نصر، أنها ترفض طرح هذه الأغاني خلال الفترة المقبلة، بسبب انشغال الذوق العام لأنواع أخرى من الأغاني، وقد لا تناسب هذه الأغاني الجمهور، كما أن الوقت الحالي فترة امتحانات وهناك اهتمامات تشغل بال الجمهور.
وتابعت: الوسط الفني عبارة عن «شلل» ولكل شلة معارفها، والوسط الفني لا يحبون بعضهم البعض.
كما تحدثت المطربة مروة نصر، عن تفاصيل حياتها الشخصية وأسرتها ووالدتها التي تتولى الطبخ بالمنزل حتى بعد زواجها، وقالت: "مش بغير لون شعري ومش بعمل حاجة في وشي وبيتغير بالميك أب ولو شوفتيني من غير ميكب مش هتعرفيني، لأن الميكب بيغير أي حد، وبحب أرتدي الاسدال وبعيد عن التصوير برجع إنسانة طبيعية وفي أسعد حياتي لما مكنش قدام إضاءة".
وتابعت مروة: لحد دلوقتي ماما هي اللي بتطبخ وأنا من غيرها مليش لازمة، وولادي بيحبوا أكل تيتة ومش بيأكلوا غير من أيديها.
أضافت مروة: "أنا أم ومطربة وبحب كل حاجة لوحدها والأمومة وحياة الأطفال بالنسبالي خط أحمر، وكندا بنتي بتحب ترسم".
كما كشفت المطربة مروة نصر، أنها كانت تتمنى أن تكون طبيبة، وأن والدها السبب في دخولها معهد الموسيقى، وقالت: "كان نفسي أبقى دكتورة وعائلتي مش بتحب الفن، ووالدي أثر على دخولي معهد الموسيقى وكان بيحب الفن الله يرحمه بعكس أعمامي".
وتابعت مروة نصر: "والدي توفي قبل طرح أول ألبوم ليا في حياتي بيوم واحد، وكان شايفني في حتة تانية أنا مكنتش شايفاها وعرفت ده لما كبرت، ولولا والدي كان مصير بيتي وولادي وأسرتي في حتة تانية، وكنت ممكن أبقى زي أي بنت باباها معرفش يرسم حياتها صح".
وأنهت مروه نصر حديثها قائلة: "أنا عصبية جدا ومعرفش أعمل كنترول على تصرفاتي وبهدى بعد ربع ساعة من انفعالي، وأنا مش شقية وبنظرة تاخديني لدنيا تانية".
