تحدث عنها السيسي.. مصطفى بكرى يكشف تفاصيل عمارة ميناء الإسكندرية المخالفة
كشف الإعلامي مصطفى بكري؛ تفاصيل عمارة الإسكندرية المخالفة والتي أشار إليها الرئيس خلال افتتاحه بعض المشروعات التنموية بمحافظة الإسكندرية.
وقال بكري خلال برنامج "حقائق وأسرار" المذاع على قناة "صدى البلد": "عمارة الإسكندرية؛ ايه حكاية العمارة والمدرسة اللي أتكلم عنهم الرئيس السيسي يوم الخميس الماضي وهو بيفتتح مشروع تحيا مصر في ميناء الإسكندرية".
وأضاف: "دي مش أول مرة يتكلم عنها السيد الرئيس؛ الرئيس أتكلم قبل كدة عن الموضوع دة من حوالي 3 سنين لما كان بيفتتح مشروع بشاير الخير في 2020 وانا كنت موجود في اللقاء دة والموضوع باختصار عشان الجماعة واخدينه تريند والحقوا الراجل راح دبي والرئيس أمر بحبسه".
وتابع: "العمارة تم بنائها بين ميناء الإسكندرية وشارع الماكس في الورديان والترخيص اللي كان طالع كان واخد رقم 399 وبيقول أن الأرض ملك شخص يدعي يوسف مصطفى حرب وأنشأ مدرسة اسمها علوم المستقبل جنب العمارة المخالفة وكان أي حد ساكن في المبني شايف جزء كبير من ميناء الإسكندرية".
وواصل: "مساحة العمارة 2000 متر مربع وفيها 64 شقة وأربع مداخل خاصة ومساحة المدرسة 2400 متر مربع والغريب في القضية أن الراجل مالك العقار قدر يبني على أرض الميناء مباشرة وحصل على تراخيص من عدد من أصحاب اللاضمير وفي كلام أنه زور بعض المستندات".
وأكمل: "ده يخلينا نسأل مين ساعده وازاي قدر يرخص لبناء الأرض ويعمل هذا البناء وينفذه بالطريقة اللي احنا شفناها؛ الأسبوع الماضي وبعد حديث الرئيس شفنا حملة ممنهجة وادعاءات واكاذيب؛ يوسف مصطفى حرب استلم الأرض من الدولة حق انتفاع استثمار وليس بموجب عقد ملكية وكان بيسدد سنويا حق الانتفاع لغاية 2007 وبعد 2007 توقف عن السداد وعمل عقد ابتدائي بينه وبين شخص واخد صحة توقيع واختصم في الدعوة جهاز حماية أملاك الدولة".
وأوضح: "ممثل الجهاز راح وقال إن الأرض ليست ضمن خرائط أملاك الدولة وصدر حكم بملكية الأرض وقدم على رخصة بناء وصدرت رخصة البناء برقع 399-41-15 بتاريخ 15 سبتمبر 2013 وفيها مواصفات المبني والمكتب الهندسي المعتمد يعني على الورق المبني مش مخالف من ناحية اشتراطات البناء لكن الأرض عليها مشاكل
واختتم: "بعد كدة راح عامل اقترار بالتنازل عن الرخصة وبعدها حصل على موافقة ميناء الإسكندرية على الترخيص ووزارة الري وبعد الانتهاء من البناء حصل على شهادة الانتهاء من البناء عشان يدخل المرافق؛ ثم تم بيع جميع الوحدات والبناء تم على حرم ميناء الإسكندرية ومع ذلك قدر صاحب العقار يحصل على ترخيص بناء ويحصل على الأرض اللي عليها من الأساس مشاكل".
