تشبه علم المثليين.. عمرو أديب يعلق على العلامة المائية على الـ 20 جنيه المتداولة
طالب الإعلامي عمرو أديب؛ البنك المركزي بتوضيح حقيقة العلامة المائية على الـ 20 جنيه الجديدة والتي تشابه علم المثليين.
وقال أديب خلال برنامج "الحكاية" المذاع على قناة "أم بي سي مصر": "بقالنا كام يوم بيعرضولنا الـ20 جنيه الجديدة البوليمير اللي هتنزل في العيد؛ هايل وخطوة عظيمة وقبل كدة كان عندنا العشرة جنيه البوليمير هذا شيء عظيم".
وأضاف: "عندي 3 مصادر للعشرين جنيه دي؛ موقع المصري اليوم وموقع المال وموقع الهيئة العامة للاستعلامات؛ أنا شفت الـ 20 جنيه دي فيها حاجة مريحتنيش؛ جايز تقولي أنت خلاص اتعقدت ودماغك نغمشت أو مش عارف ايه؛ أنا اتحدث مش عن سوشيال ميديا؛ هذه المواقع التلاتة حتى اللحظة اللي أنا بتكلم فيه دي حطين العشرين جنيه وموقع واحد بس اللي شالها وهو موقع الهيئة العامة للاستعلامات".
وتابع: "جريدة المال حاطة الـ 20 جنيه وكاتبة المصدر هو الهيئة العامة للاستعلامات؛ أنا بعت العشرين جنيه دي لكذا حد معتبر؛ العلامة المائية الموجودة على العشرين جنيه قريبة الشبه من علم المثلية؛ واللي مضايقني أكتر أنها موجودة على الجامع".
وواصل: "أنا أتحدث عن 5 أو 6 مواقع حطين هذه العشرين جنيه رغم أن عندي شك كبير فيها لانها بامضاء طارق عامر محافظ البنك المركزي السابق؛ العلامة المائية دي متبانش غير تحت الشمس أو نور الموبايل عليها فتبان معاك".
وأوضح: "دي عملة بلدي ودا جامع بلدي؛ أنا بقول بما أنه العملة منزلتش لغاية دلوقت؛ في حال كان دة التصميم النهائي ياريت ياجماعة لو تقدروا تتداركوا هذا الأمر؛ احنا تواصلنا مع البنك المركزي مخدناش رد واضح؛ مفيش متحدث باسم البنك المركزي تقدر تستضيفه ولكن الاخوة في الهيئة العامة للاستعلامات قالوا لا فيها مشكلة وشيلناها".
وأكمل: "لو سمحتم لو هذا الامر موجود وأنت مضطر أن تكون دي العلامة المائية بتاعتك شيلها من على الجامع؛ الموضوع لسة فيه أخد ورد ولسة ممكن متكونش طبعت كل الكمية أو قولي هذا الامر غير موجود لا الجامع ولا العلامة المائية؛ أنا بكلمك عن سبع أو تمن مصادر تعتمد هذا الشكل من العملة أنه نازل كمان كام يوم".
واختتم: "سك على المطلوب لو هذا الأمر غير موجود؛ أنا مبكلمكش على فوتوشوب معمول في موقع تحت الأرض؛ إلى المسؤولين عن البنك المركزي لو سمحتوا يادار ما دخلك شر؛ الو الموضوع مش موجود أنسوا ان عمرو أتكلم لو الموضوع موجود أبعد ده عن ده".
