محمد الباز يوجه رسالة لوزارة التعليم بعد شائعات تسريب امتحان اللغة العربية
علق الإعلامي محمد الباز، على ما تردد عن تسريب امتحان مادة اللغة العربية للثانوية العامة على وسائل التواصل الاجتماعي والذي انعقد صباح الأحد.
وقال الباز خلال برنامج "أخر النهار" المذاع على قناة "النهار": "النهاردة بدأ المارثون الحقيقي لامتحانات الثانوية العامة، النهاردة السباق الجاد، والثانوية العامة مهما يغيروا نظامها بتظل نقطة مفصلية في حياة الأسر في مصر وفي حياة الطلبة بتوع الثانوية لأن السنة دي هي اللي بتحدد أنت هتبقي أيه".
وأضاف: "أنا وقفت عند بعض الملاحظات النهاردة في اليوم، أول حاجة الناس لسة بتتكلم عن تسريب الامتحان والمواقع تقولك تسريب امتحان اللغة العربية؛ بعد دقائق الامتحان يتم تداوله على مواقع التواصل الاجتماعي".
وتابع: "تسريب الامتحان شيء وانه في طالب صورة الامتحان وبعته وحد نزله ودي حاجة تانية؛ تسريب الامتحان معناه أنه تسريب جماعي، أنه خرج من الغرف بتاعته المحصنة والناس عرفته وانتشر على شكل واسع، ويبقي الامتحان قبل ما يوصل للطلبة دا التسريب".
وأوضح: "اللي بيحصل دة عبارة عن جريمة، طالب أو اتنين صور الامتحان واتبعت واتنشر على قناة على التليجرام ودا منقدرش نقول عليه تسريب، يجيبوا يقولوا الامتحان انتشر قبل اللجنة طيب لو الامتحان انتشر قبل اللجنة يبقي تسريب".
وأكمل: "أول ما تبدأ اللجنة بتاعة الامتحان والامتحان انتشر على المواقع دة مسموش تسريب لو قبل يبقي تسريب".
وذكر: "وزارة التعليم طلعت بيان، المتحدث باسم وزارة التربية والتعليم طلع تصريح وقال صور ورقة امتحان العربي اللي تم تداولها قبل بدء امتحان مادة اللغة العربية، بس هو بيقول ايه؟ الورقة دي غير صحيحة وليس لها أي علاقة بمادة امتحان اليوم وهنا في لبس احنا محتاجين نفهمه؛ التطمينات بتقول إن الامتحان مفيش تسريب".
واختتم: "يظل السؤال اللي الوزارة لازم تبقي واضحة وصريحة في الإجابة عليه، أنا مش بشكك في كلام المتحدث باسم وزارة التربية والتعليم ولكن الكلام في البيان قال إن ورقة الامتحان اللي تم تداولها قبل انطلاق امتحان مادة اللغة العربية، محتاجين البيان يبقي أوضح شوية ومحتاجين الناس في الوزارة يتكلموا".
