خيري رمضان يتساءل عن ارتفاع أسعار حديد التسليح: "زيادة غير منطقية"

علق الإعلامي خيري رمضان على ارتفاع أسعار حديد التسليح بشكل مبالغ فيه، مشيرا إلى أن الزيادة في قيمة الدولار مقابل الجنيه لا تساوي ارتفاع أسعار الحديد والذي زاد 3 أضعاف.

وقال رمضان خلال برنامج "حديث القاهرة" المذاع على قناة "القاهرة والناس": "أما حد يسأل بتوع التطوير العقاري هي ليه البيوت غليت كدة؟ يقولك أنت عارف الحديد بقي بكام؟ دا كان بـ12 بقي بحاجة وأربعين ألف جنيه".

وأضاف: "وصل طن الحديد إلى 42 و43 ألف جنيه ليه؟ تعالوا نشوف المسألة ايه بالظبط؟ ليه الحديد عندنا غالي بينما الحديد في الخليج أقل من مصر في السعر 10 ألاف جنيه".

وتابع: "لو جبت الحديد من تركيا وبعض البلاد اللي برة يطرح في مصر أرخص من الحديد المصري؛ ايه السبب؟ القصة في 2017 فرض المهندس طارق قابيل وزير التجارة والصناعة حينها رسوم اغراق على استيراد حديد التسليح لمدة 5 سنوات".

وواصل: "فرض رسوم الإغراق على الحديد المستورد من تركيا وأوكرانيا والصين ليه؟ عشان يحافظ على الصناعة الوطنية؛ وجات بعده الدكتورة نيفين جامع وزيرة التجارة والصناعة السابقة مدت قرار العمل برسوم الإغراق لمدة 12 شهر تنتهي في شهر يونيو الجاري".

وأوضح: "وهنا بدأ الجدل الكبير؛ بين غرفة الصناعات المعدنية وصناع حديد التسليح؛ اللي بيطالبوا باستمرار فرض رسوم الإغراق والمطورين العقاريين اللي شايفين أن الغاء الرسوم هيساهم في خفض أسعار الحديد بنسبة 25% ودا هيساهم في خفض تكلفة البناء وانتعاش السوق العقاري أو اللي بيبني بيت يعرف يبني".

وأكمل: "البعض يرى أن في مبالغة في سعر الحديد وأن الأسعار دي غالية فعلا؛ مع أنك لو سمعت منتجي الحديد هيقولك أحنا بنخسر؛ ليه أسعار الحديد المصري مرتفع أنا مش عارف".

وذكر: "الحديد غالي ليه؟ وليه لما بنجيبه من برة ارخص؛ الدول برة بتدعم شركات الحديد لدرجة أنه يبقي فائض عندهم ويتصدر برة ويبقي ارخص من الحديد المصري؟ دا شيء مش مفهوم؛ هل يا تري في قيود وضرائب وجمارك تثقل كاهل صناع الحديد في مصر؟ ماذا يمكن أن تفعل الدولة بحيث أن تخفف عن الناس شوية".

واختتم: "بلا منطق أن الحديد يضرب؛ لما كان الدولار بـ22 جنيه كان الحديد بـ12 ألف وشوية؛ أه أحنا عدينا الـ30 في سعر الدولار ولكن النسبة متعملش الفرق دة كله بحيث توصل تلات أضعاف وأربع أضعاف".