والدة الطبيب قتيل شبرا تكشف تفاصيل علاقة ابنها بالمتهم

كشفت والدة الطبيب الذي قتل على يد أحد زملائه في عيادته الخاصة بمنطقة الساحل التابعة لحي شبرا تفاصيل علمها بوفاة نجلها.

وقالت والدة الطبيب القتل في مداخلة مع برنامج "يحدث في مصر" المذاع على قناة "أم بي سي مصر": "أخر مكالمة مع أبني كان يوم الجمعة الصبح وكان خلص الشغل بتاعه في مستشفى معهد ناصر وكان مروح للبيت وكان راكب المواصلات وقلتله أنت مروح وقالي ادعيلي يا ماما".

وأضافت: "جه يوم السبت أخوه اتصل بيه وقاله أنت عامل ايه وكده وأنا كنت بتصل بيه كل يوم صبح ومغرب وكنت على طول اتصل بيه أعرف أخباره وأخوه بردو كان على اتصال بيه على طول؛ ابني كان طبيعي ومفيش أي حاجة غريبة خالص عليه".

وتابعت: "اخوه كلمه السبت ورد عليه؛ يوم الحد بالتحديد اللي هو يوم 4 يونيو الساعة سبعة و43 دقيقة؛ ابني كان في قسم العظام ومعاه دكتور زميله جاتله مكالمة من برة ورد وقال لزميلة نص ساعة وهتلاقيني عندك".

وأكملت: "من ساعة ما خرج فص ملح وداب؛ جينا تاني يوم الاثنين؛ كان في معهد ناصر وبيشتغل في العيادة مع الدكتور اللي بيتحقق معاه وأسمه احمد وهو بيشتغل معاه في نفس القسم وبيشتغل معاه في نفس العيادة ويعرف جميع أسرار ابني وجميع المعلومات عنه".

وأوضحت: "الدكتور المتهم أكبر من ابني بسنتين وابني بيشتغل بقاله 3 سنين معاه في نفس القسم؛ انا ربيت ابني على النقاء والطيابة وكان قمة الاخلاق العالية والذوق؛ الولد كان ملاك في صورة بشر؛ ولا عمر حصل بين ابني وبين مخلوق خلال 29 سنة مشكلة".

وواصلت: "العلاقة بين أبني والدكتور أحمد بس كانت في الشغل بس ومكانش بيزورنا في البيت ولا حاجة العلاقة كانت عمل بس؛ أنا حسيت أن الراجل ده اللي دبر لابني كل حاجة وعارفة أن قضاء مصر عادل وهيجبلي حقي".

واختتمت: "ابني عمره ما عمل مشكلة مع حد؛ اسالوا زملائه اللي كانوا معاه في الدفعة واسالوا أهل البلد وأسالوا طوب الأرض الولد كان ملاك في صورة بشر".