عمرو أديب يرد على السخرية من مرشحي الرئاسة: "ما تيجي تترشح أنت؟"
علق الإعلامي عمرو أديب؛ على سخرية البعض من كل شخص يعلن ترشحه لانتخابات الرئاسة، مشيرا إلى أن الانتخابات يجب أن يتواجد فيها مرشحين.
وقال أديب خلال برنامج "الحكاية" المذاع على قناة "أم بي سي مصر": "خلوني أنتقي كلماتي واختارها بعناية شديدة لأن الموضوع دة حساس جدا رغم أنه طبيعي؛ ساعات الحاجات البديهية فجأة تتحول لموضوعات ملتهبة".
وأضاف: "في انتخابات رئاسية كلنا متفقين؛ المعلومة دي معروفة؛ البديهي أنه لما يبقي في انتخابات رئاسية مش استفتاء بيبقي المنافسة بين أطراف؛ الرئيس الموجود وأطراف أخرى تقرر أنها ترشح نفسها دا بردو بديهي والا مش بديهي".
وتابع: "الرئيس الموجود في ناس هترشح نفسها ضده؛ أنا لا يمكن هرشح نفسي ضد حد وأقول فيه؛ مش ممكن هقول أنا مرشح نفسي قدام عمرو أديب بس عمرو جميل وحد حلو؛ ومادام عمرو جميل وحد حلو أنت عايز مننا حاجة؟ ملكش دعوة أنت".
وأوضح: "البديهي أن الناس اللي مرشحة نفسها يهاجموا بعض؛ هو يهاجم الرئيس الموجود ويهاجم الناس الموجودين؛ دي بديهية أن أنت داخل عشان تنال من الرئيس الموجود وأنت داخل عشان تكون رئيس جمهورية مصر العربية".
وأكمل: "ليه يا جماعة كل ما حد يرشح نفسه ألقي موجة تريقة وسخرية على الناحيتين؛ لو انت معارضة أيوة طبعا مسرحية؛ لو أنت موالاه أنت مين أصلا عشان ترشح نفسك طيب نعمل ايه؟ لازم ياجماعة يكون في ناس ويكون في منافسة ويكون في شيء حقيقي نشوفه ونتمسك بيه".
وذكر: "أحاول أكون صريح أكتر شوية ومش عارف بعمل كدة ليه؛ ناس كتير هتقولي أنت بتعمل كدة عشان الاجندة وحد قايلك".
وأوضح: "الناس اللي قاعدة بتقول مين دة ودي تمثيلية وفي حقيقة الامر رجل أعمال كبير قال كدة؛ وصحفي مخضرم قال كدة سياسي سابق كبير قال كدة؛ طيب ما تيجي يافندم ترشح نفسك وأكيد مش هتبقي لا تمثيلية ولا مسرحية".
وواصل: "ما ترشح نفسك ما تيجوا يا جماعة دي بلدنا؛ خش أدخل؛ هكون صريح أكتر هتقولي أه أنت عايزني أدخل واحط نفسي في خطر؛ العمل السياسي محفوف بالمخاطر خاصة في الدول الجديدة في الديموقراطية".
واختتم: "أنت داخل مسالة هامة جدا؛ فيها مخاطرة وضيق ومشاكل؛ في العالم برة المسألة ليست بالسهولة وهذه ليست مقارنة في أمريكا المواطن اللي بيقرر يرشح نفسه بيلف الـ50 ولاية في أمريكا".
