مصطفى بكري يكشف أسباب رفض محمد مرسي إذاعة القسم أمام الدستورية العليا

كشف الإعلامي مصطفى بكري؛ أسباب رفض الرئيس المعزول محمد مرسي إذاعة القسم أمام المحكمة الدستورية العليا في وسائل الإعلام.

وقال بكري خلال برنامج "حقائق وأسرار" المذاع على قناة "صدى البلد": "طلع محمد مرسي من ميدان التحرير وسط الهتافات وراح يوم 30 إلى المحكمة الدستورية العليا وكان حاطط الخطة أنه ميذيعش القسم عشان لما يروح جامعة القاهرة وفي أعضاء مجلس الشعب المنحل مع أخرين عشان يقسم قدامهم".

وأضاف: "قالهم بصوا بلاش نذيع القسم ممكن نسجله وبعدين تبقوا تذيعوه؛ ولكن الجمعية العمومية للمحكمة الدستورية قالوا لا لازم نذيع القسم ولما لاقاهم مصريين قالهم طيب 5 دقائق وراح اتصال بالتليفون واستني الرد وبعدين قالوله ذيع".

وتابع: "طلع بعدها محمد مرسي وأشاد بالمحكمة الدستورية واحكامها وبعدين راح جامعة القاهرة قال العكس وكان في جامعة القاهرة جمع كبير من الاخوان وحلفائهم وقبلها دعا المشير طنطاوي وعدد من القادة وكان في رأي أنهم ميرحوش لأن الناس دول مش محكومين وممكن يهتفوا وبتاع".

وواصل: "اللواء حسن الرويني اتصل بالمرشد والمرشد خلي محمد البلتاجي يكلمه وبعدين قال أنا هراعي الموضوع ومش هسمح لأي حد يتطاول واتخذ المجلس العسكري قرار أن وفد من المجلس يروحوا ومجرد ما دخل القادة العسكريين اشتغل محمد البلتاجي يسقط يسقط حكم العسكر".

وأكمل: "اللواء حسن الرويني بصله وقاله يا محمد احنا دافنينة سوا وقاله هننسحب لو الكلام دة متوقفش فالمرشد بص للبلتاجي ووقفوا الهتافات".

وأوضح: "الموقف التاني الدكتور أحمد الطيب شيخ الازهر دخل وشالوا أسمه من على الكرسي وحطوا واحد أخواني بداله وقالوا لشيخ الازهر هندورلك على كرسي فطبعا شيخ الازهر بكرامته واحترامه لنفسه اضطر أنه ينسحب".

وأشار بكري إلى أن القوات المسلحة وقفت دعما للشرعية مشيرا إلى أنه دعم اعلان اللجنة العليا للانتخابات حينها بفوز محمد مرسي في الانتخابات ولم يسعى إلى التدخل رغم ما تردد من أكاذيب وادعاءات.

واختتم: "المؤسسة العسكرية وقفت موقف المحايد رغم الوساوس اللي كانت عند الكل من المشير طنطاوي لاصغر جندي لكن خلال الأمر حدث دعونا نشوف هيعملوا ايه".