تامر أمين يعلق على تحذير الاتحاد الدولي للاعبين: "سمعتنا سودة"
علق الإعلامي تامر أمين؛ على تحذير الاتحاد الدولي للاعبين المحترفين لكافة اللاعبين في العالم بعدم التعاقد مع الأندية المصرية نظر للانتهاكات التي تقوم بها في العقود.
وقال أمين خلال برنامج "أخر النهار" المذاع على قناة "النهار": "خليني أبدأ معاكم الأول بفضيحة؛ عيوبك لما تكتشفها اسمه اكتشاف عيب؛ ولما متعالجهاش يبقي عند وغباوة في البقاء والحفاظ على العيب ولما غيرك بقي يجيب عيبك دة وينشره وسط العالم ملهاش وصف تاني غير الفضيحة وأنه بيفضحك".
وأضاف: "جدتي قالت زمان المثل الشعبي المشهور؛ قال يا رايح كتر الفضايح ولكن دول قعدين لسه فالمثل يتحور إلى يا قاعد كتر الفضايح؛ اتحدث عن اتحاد الكرة المصري ومنظومة الكرة في مصر".
وتابع: "النهاردة الاتحاد العالمي للاعبين المحترفين فضحنا فضيحة بجلاجل؛ عارف لما تصحي من النوم فتلاقي حد ناشرلك غسيلك للي رايح واللي جاي؛ البيان أنه الاتحاد العالمي للاعبين المحترفين يحذر اللاعبين في كل اندية العالم وكل قارات العالم من التعامل مع الأندية المصرية والاتحاد المصري لكرة القدم".
وواصل: "هما اللي بيقولوا مش أنا اللي بيقول؛ الكلام واضح بيقولوا بسبب الانتشار الكبير للانتهاكات التعاقدية والمشاكل القانونية في العقود؛ الاتحاد بيقول نظر للانتشار الواسع للانتهاكات التعاقدية فأن الاتحاد يحذر كل اللاعبين المحترفين من التوقيع للأندية في مصر".
وأوضح: "الكلام معناه أن أحنا نقلق وأننا في الكرة عندنا هجامين مينفعش تتعامل معانا عشان ممكن نقلبك؛ الانتهاكات التعاقدية دي مين مشترك فيها؟ طرفين النادي والاتحاد اللي بيوثق العقود ويطلع الرخص".
وأكمل: "الاتحاد هو كبير الأندية وحتى لو النادي غلط المفروض الاتحاد يقوله لا دا مش عقد؛ لا مينفعش؛ الانتهاكات اللي يقصدها الاتحاد العالمي منها طبقا مبيخدوش مستحقاتهم عندنا دي زي السلام عليكم عندنا وسمعتنا سودة في الحكاية دي".
وذكر: "اتنين اللعب بقي في العقود؛ انتوا شفتوا الكلام دة السنة اللي فاتت وتحديدا في نادي أو اتنين؛ يقولك العقد دة اتعمل بس متوثقش والعقد دة فيه بند يخليك تبيع اللاعب والفلوس متروحش للنادي؛ كمية انتهاكات تخزي؛ تخيل كدة لما تبقي عايش في شارع ويجي واحد كبير يقولك يا جماعة محدش يتعامل مع الناس دي عشان نصابين شكلك هيبقي ايه في الشارع؟".
واختتم: "نرجع مرجوعنا كل دة ليه؟ أنا قلتلكم ابحث عن السستم ولكن أنا بقولك متدورش أوي لأنك مش هتلاقيه؛ لا يوجد سستم ولا نظام ولا تخطيط ولا قوانين واضحة وشفافة".
