عمرو أديب يهاجم مرتضى منصور: "هو أحنا بناكل من بيت أبوك؟"
أكد الإعلامي عمرو أديب؛ أن استضافته للنائب سليمان وهدان عضو مجلس إدارة نادي الزمالك تأتي من أجل الاستماع إلى ما يمر به النادي بعيدا عن تصريحات مرتضى منصور وأبنائه.
وقال أديب خلال برنامج "الحكاية" المذاع على قناة "أم بي سي مصر": "الجملة اللي هقولها غريبة شوية؛ لأول مرة هنسمع حد من مجلس إدارة نادي الزمالك حد غير مرتضى منصور؛ لأن دائما مجلس إدارة الزمالك اللي بيتحدث مرتضى منصور".
وأضاف: "لأول مرة هنسمع حد بيتحدث بشكل واضح ومطول عن نادي الزمالك؛ النائب سليمان وهدان عضو مجلس إدارة نادي الزمالك حسب فهمنا لأن مرتضى منصور قد عزله".
وتابع: "الأهم حكاية نادي الزمالك؛ نادي الزمالك في مهب الريح القضية بتاعة شيكابالا ومطلوب مليون ونص دولار ومش عارف ايه؛ هل في فلوس في النادي ولا مفيش؟ الفلوس محجوز عليها والا لا؟ نحن نسمع الأمر من خلال مرتضى منصور فقط هو بس اللي يتكلم هو اللي يطلع ويقعد الناس قدامه تلاميذ ويتكلموا".
وواصل: "مجلس الإدارة الموجود دة هو مجلس له رأي يمثل النادي؟ ايه اللي بيحصل ايه الحكاية؟ نحن لا نعرف شيء عن نادي الزمالك؛ نادي الزمالك صندوق مغلق في منزل مرتضى منصور؛ أو هو وولاده هما بس اللي يعرفوا وهذا أمر غير مؤسسي لأن النادي دة مش بتاع حد دا بتاع الدولة".
وأكمل: "لما بتكلم عن نادي الزمالك بتكلم عن النادي الشعبية الثانية؛ ولكن أنه يتساب كدة أنه يتبهدل كدة وأنه يبقي مش لاقي ياكل كدة؟ أحنا بنتكلم عن نادي أخر بيعمل الفرع الرابع ليه واحنا مش عارفين نعمل الفرع التاني".
وأوضح: "رئيس النادي المعزول كان بيمشي في النادي يجيله الموظفين يقول أنا أسف هقبضك منين؟ بيكلم عامل من العمال قاله أمشي كدة شوفوا هتجيبوا مرتباتكم منين".
وذكر: "لأول مرة أنه هنسمع حد بيقولنا حاجة تانية حد من جوة النادي؛ اتحدي حد يعرف رقم أو معلومة؛ وعندنا يرحل أنا ماشي بقي وأبقوا شوفوا بقي هتاكلوا منين ليه احنا بناكل من بيت أبوك؟ هو النادي دة مش ليه دخل وليه رعاية وليه دولة؟ هو مش ملك مرتضى وأبنائه زهقنا بقي بجد عايزين نعرف ايه الحكاية"ز
واختتم: "انت مثلا عايز تقولي إنه الخطيب ممكن يعامل العامري فاروق كدة؟ أبدأ في مجلس إدارة في الأهلي في مجلس إدارة في فيوتشر في مجلس إدارة في بيراميدز ولكن احنا عندنا مرتضى منصور وأبنائه بس واللي عنده مفيش فلوس جاله العامل الغلبان قاله أمشي من هناك شوف هتفبض منين؛ هو بيقبض من جيبك دا عامل في الدولة".
