تامر أمين يعتذر للدكتور زاهي حواس بسبب نتفلكس

وجه الإعلامي تامر أمين، اعتذارا للدكتور زاهي حواس عالم الأثار المصري بعدما ذكر خبرا يشير إلى أن حواس قد تعاقد مع منصة “نتفلكس” على فيلم جديد بعد الأزمة الأخيرة التي أثارتها المنصة الأمريكية بسبب فيلم كيلوبترا.

وقال أمين خلال برنامج "أخر النهار" المذاع على قناة "النهار": "اعتذار واجب وتوضيح لازم؛ وقبل الكلام أنتوا عارفين مبدئي أن الإنسان اللي بيحترم نفسه ويحترم الأخرين هو طول الوقت لا يتكبر على الاعتذار حين يخطأ؛ أنا أخطأت الأسبوع الماضي لما جالي صياغة خبر أن الدكتور زاهي حواس والدكتور مصطفى وزيري تعاقدا على فيلم جديد في منصة نتفلكس".

وأضاف: "الأسبوع اللي فات جالي الخبر أن الدكتور زاهي حواس تعاقد مع نتفلكس على فيلم اسمه المجهول وساعتها انتقدت الدكتور زاهي حواس لأنه كان موجود معايا قبل كام يوم وكنا بنهاجم نتفلكس بسبب الفيلم المزيف للتاريخ الخاص بكيلوبترا وقلت ازاي يا دكتور زاهي تبقي معايا وبنهاجم نتفلكس وتيجي دلوقت نتعاقد معاها على فيلم جديد".

وتابع: "الدكتور زاهي حواس تواصل معايا ودا الحقيقة من كرمه؛ وقالي يا تامر أنا سمعت الفيديو اللي أنت قلتله عليا وقالي أنت فهمت غلط قلتله ايه اللي غلط قالي أنا الفيلم اللي عملته مع نتفلكس دا فيلم انا عاملة ومصوره من سنة ونص أو سنتين وبالتالي دة مش تعاقد جديد أنا عاملة الأسبوع دة بعد جريمة نتفلكس في موضوع كيلوبترا".

وواصل: "أنا قلتله أنا أسف يا دكتور والاعتذار ليك واجب على الهوا وأنا بعتذر للدكتور زاهي حواس والدكتور مصطفى وزيري على أني قلت إن الفيلم تم التعاقد عليه هذا الأسبوع ومينفعش نبقي بنكافئ نتفلكس على موضوع كيلوبترا".

وأوضح: "أخر المكالمة بيني وبين دكتور زاهي حواس دخلنا بردو في السجال اللي قلتله في أخر الفيديو والدكتور زاهي قالي حتى لو اعترضت وهاجمت نتفلكس لو جات بكرة عملت حاجة صح أنا ممكن أشترك فيها أنا مليش علاقة بالكيان والمنصة أنا لو المنتج كويس هشتغل فيه وأنا قلتله أنا بحترم المدرسة دي ولكن أنا مدرستي مختلفة".

واختتم: "أنا بقول وجهة نظري ومدرستي مختلفة أنا مدرستي بتقول اللي اتقرص منه مرة مقربش منه بالمرة؛ مادام في مدارس ييبقي اختلاف المدارس رحمة".