أحمد موسى يهاجم تعديلات قانون ضريبة الدمغة: "جباية على المواطن"

هاجم الإعلامي أحمد موسى؛ تعديلات قانون ضريبة القيمة المضافة والتي وافقت عليها لجنة الخطة والموازنة بمجلس النواب مشيرا إلى أن المواطن لا يتحمل أي زيادات جديدة.

وقال موسى خلال برنامج "على مسؤوليتي" المذاع على قناة "صدى البلد": "هبدأ من يوم الأربعاء كان معانا النائب ياسر عمر وكيل لجنة الخطة والموازنة بمجلس النواب الحكومة بعتت تعديلات على زيادات بعض الحاجات؛ بكرة القانون في مجلس النواب وأنا هنا بخاطب سيادة المستشار الجليل حنفي الجبلالي رئيس مجلس النواب والسادة أعضاء مجلس النواب".

وأضاف: "خطابي ليهم أن احنا في مرحلة أو في ظرف يحتاج كل واحد في مجلس النواب بكرة هو مواطن عنده اسرة قبل أن يكون نائبا والسادة النواب عارفين مطالب الناس وأنا بتكلم النهاردة لأنه من يوم الأربع لقيت ناس كتير يا بيكلموني يا بيبعتولي في ردود فعل على مداخلة النائب ياسر عمر".

وتابع: "بضمير كل واحد فيها أحنا كلنا مع البلد ولما نتحدث بلسان المواطن لسان المواطن هو مصلحة مصر ومصلحة هذا الشعب فكل نائب بكرة لازم وقفة؛ أنه النهاردة في مصر مبقاش في طبقة متوسطة من الاخر يعني؛ يا عندنا مجموعة عددهم قليل وهم الأغنياء والباقي بقي في عندنا مشكلة كبيرة".

وأوضح: "الأسعار ضربت كل البيوت من الأول للأخر مفيش مسؤول النهاردة أو مواطن عايش في عشة أو نجع أو في قصر كله اتأثر؛ كل واحد بيصرف على قد دخله وبالتالي الفقير عنده مشكلة والغني عنده مشكلة والحكومة عندها متطلبات يعني لازم نزود هنا وهنا واحنا بلد مواردنا ليست كثيرة وعندنا أزمة في الإيرادات".

وواصل: "الأمر النهاردة نعمل ايه؟ نظبط الدنيا ازاي؟ كنت النهاردة بتكلم وأقلكم بعد شوية على التفاصيل؛ أنا عايز سياحة في مصر؟ عايز يجي السائح اللي جاي في شرم الشيخ ميدفعش 50 جنيه وأجي للسائح اللي جاي العلمين الجديدة أو الجيزة أو سيوة يدفع".

وذكر: "حضرتك عايز سياحة؟ الدول اللي جنبك عاملة ترويج هائل للسياحة وأنت جاي النهاردة تقول السايح يدفع؛ السائح جايلك اديله حوافز مش هقوله أدفعك وأنت ماشي؛ تفتكر وأنت بتعمل دة هيجيلك السائح؟ الموضوع مش كام هيدفعه ولا الموضوع كام هيدفعه؛ المسألة هل في هذا التوقيت بتعمل إجراءات في صالح البلد في صالح السياحة الإجابة لا ".

واختتم: "بتعمل غلط في التوقيت الغلط لأن هذا ليس توقيت أي زيادات على المواطن؛ مع تقديري للحكومة ولكن هذا ليس التوقيت المثالي خالص ننتظر ياجماعة نعدي الفترة دي أنا بقول كفاية أرجوكم بدون تفاصيل اللي أنا عارفها؛ السائح لما يجيلي أقبله مش أقوله هدفعك 50 جنيه وأنت ماشي عشان ميجيش تاني؛ أنت بتعمل جباية على المواطن طيب أنا كحكومة عندي بنود أخرى أقدر أشوفها ومحملش المواطن جنيه واحد".