الشيخ ممدوح عامر يرد على منتقدي ظهوره يرقص في فرح: "ما عملتش حاجة غلط"
علق القارئ الشيخ ممدوح عامر؛ على الانتقادات التي طالته بعد ظهوره خلال احتفاله في فيديو خلال حفل زفاف شقيقه الأصغر، مشيرا إلى أنه لم يقم بشيء خاطئ.
وقال عامر في مداخلة هاتفية مع برنامج "صالة التحرير" المذاع على قناة "صدى البلد": "أنا شخص طبيعي وأحب أتعامل بتلقائية وبطبيعتنا ومن في ظروفنا أو الكفيف يكون أكثر عاطفية من غيره وأنا بحب أهزر واضحك مع اصحابي".
وأضاف: "انا بحب اتعامل مع طبيعتي وكنت في فرح أخويا الصغير ووالدي اتوفي وسابهولي وأنا كان عليا مسؤولية أن أجوزه ومحسسوش بفقد الأب؛ يوم والدي ما اتوفى بقي هو يبكي ويقولي أحنا عندنا أب تاني وأنت قد المسؤولية".
وتابع: "الفرح كان مقتصر وكان فيه الناس القريبة وكنت مع أصحابي وكان معايا الشيخ محمد السوهاجي راجل منشد وانا بميل للحاجات القديمة بتاعة زمان؛ الفرقة اللي موجودة كانوا ناس محترمين وكان في حاجات لام كلثوم".
وواصل: "أنا عندي 34 سنة وأنا ممدوح الشاب اللي بيهزر مع أصحابه؛ النقابة متواصلتش معايا؛ وكان في ناس من مجلس النقابة موجودين في الفرح واللي محضرش جزء كبير منه باركلي في التليفون".
وأكمل: "الناس من مجلس الإدارة جم من قبل الحفل ما يبدأ؛ أنا مبحبش المهرجانات ومبحبش أسمعها أنا بحب الحاجات القديمة الكلاسيكية؛ سيدنا الشيخ مصطفى إسماعيل كان بيسمع كذا وكذا؛ الدنيا طبيعي وأنا من حق متابعيني أنهم شافوني بشكل معين؛ أنا شخص عادي أنا مش الشيخ ممدوح الدنيا عندي طبيعية جدا".
وذكر: "أنا بقول أي حاجة تخجل تعملها في العلن متعملهاش؛ لو شغلتك هتعمل عليك قيود وكلام من دة يبقي بلاش منها أي حد شايف أنه مكانش يحب يشوفني في الحفل أنا بعتذرله ولكن لازم يقدر أنت ده فرح أخويا".
واختتم: "أنا مش عضو في النقابة ولكن النقابة لها ما يتعلق بالقران الكريم أما شيء أخر لا ممكن يكون البيان عشان يرضي الاتجاه العام؛ أنا أعتذر للناس اللي بتابعني ولكن مش للنقابة؛ أنا والدتي بس أصابها ضرر نفسي لأنها فاكرة أن في ضرر وقع عليا من الموضوع ده".
