عمرو أديب يعلق على زيادة رسوم بعض السلع والخدمات
علق الإعلامي عمرو أديب؛ على مشروع قانون تعديلات ضريبة الدمغة والذي يفرض رسوما على بعض السلع والخدمات.
وقال أديب خلال برنامج "الحكاية" المذاع على قناة "أم بي سي مصر": "التفاوض مهم أن احنا نقعد نتكلم نقول ياجماعة النادي دا مضايقها والدور أنك تحاول تحسن ظروف التفاوض وبالمناسبة دا دور مهم لمجلس النواب أنه يقوله البند دا والسلعة دي طيب طلع دي برة".
وأضاف: "عضو مجلس النواب من أهم شغلاناته الموازنة؛ اللي هي الفلوس تيجي منين تروح فين؛ في تقديري أن الدوشة اللي اتعملت على قانون ضريبة الدمغة ملهاش علاقة بالسلع ولكن المبدأ نفسه".
وتابع: "ان شاء الله اخواتنا في مجلس النواب يقدروا يقللوا مع الوزير ويقدر هو شغلته بقي أنه يقلل التهريب شوية ويقلل الناس اللي متهربة من الضرائب؛ أنا لا واقف على الاستاكوزا والكابوريا المهم أن الناس تشعر أن الأمور ممكنة عايز أخرج ممكن؛ عايز أعيش شوية ممكن".
وأوضح: "مرة خليني اخرج في الشهر كدة أقدر أعمل حاجة اخد العيال أدخل بيهم سينما ممكن؛ أنت بتخيرني بقي أعمل دة والا أخد الفلوس أعمل بيها حاجة تانية؛ أحنا بنحاول الناس تبقى مثقفة أكتر ياخدهم مرة مسرح أو سينما أو يوديهم السيرك".
وأوضح: "مش كلها أكل وشرب يعني في وجدان وفي حياة وكل شيء يعني؛ الدولة ملتزمة بالناس بتوع بطاقة التموين ولكن في ناس تانية بالملايين بردو عايزين يعيشو؛ اكتر ناس عملوا دوشة على الـ 100 جنيه بتاعة رسم المغادرة المصريين بالخارج".
وواصل: "بنحاول إن إن شاء الله الأمور دي تمشي أن عندك شحنات قمح محتاج تدفعها ومفهوم أن الدولة في أزمة زي كل دول العالم ولذلك في رسوم إضافية والشهرين الجايين دول الناس مش عايز يحس أن في الوتيرة دي ولو تشوف الانزعاج عند مجلس النواب بردو تستغرب".
وأوضح: "الجمهور بتاع كل عضو في مجلس النواب بيقولوا الحاجات دي مش عجباني؛ البن بقي بكام النهاردة؟ أيوة مش لازم تشرب قهوة بس الناس عايزة حياتها يبقي فيها الحد الأدني ظريف يعني ميبقاش الانسان كاره حياته لسبب أو لأخر".
