محسن جابر يرد على اتهامات عمرو مصطفى: "لو رفع قضية هكسبها"
علق المنتج الموسيقي محسن جابر على اتهامات المطرب عمرو مصطفى له لاستخدام عدد من ألحانه والمملوكة لشركة محسن جابر في بعض أغاني المهرجانات.
وقال جابر خلال برنامج "كلمة أخيرة" المذاع على قناة "أون": "اللي كتبه عمرو مصطفى النهاردة أنا مستغربه لأن كل الحاجات المكتوبة دي ليس لي علم بيها ولو ليا علم بيها أنا فورا لازم أوقفها ودا مش عادتي طول مشوار حياتي لا اعتدي على أي فنان كائن من كان سواء كان اللحن ملكي أو مش ملكي".
وأضاف: "صلاح الشرنوبي باعتلي رسالة أن في مطرب بيغني كذا وبعتلي الفيديو بتاعه والمقدمة الموسيقية هي اغنية بتونس بيك؛ وكان ردي أن المطرب دة بيغني باي لغة؟ وطلع المطرب جمهوره بالملايين ولكنه إسرائيلي".
وتابع: "بعتله قلتله يا صلاح ده مطرب إسرائيلي وكلفت مكتب محاماة ليه اتصال بمكتب إسرائيلي لمقاضاة المطرب ودي هي الأصول".
وواصل: "أنا اللي اكتشفت عمرو مصطفى، وأنا اللي كنت بدعمه ومازلت أدعمه، وحبي له لا يشوبه أني اختلف معاه؛ هو راجل موهوب ولكن اندفاعه بيوتر الدنيا وبيزعل منه فنانين كتير ".
وأكمل: "أنا مش بتاع المهرجانات أنا راجل أنتجت لفايزة أحمد وميادة الحناوي ووردة وعاصرت السنباطي وعبد الوهاب؛ أنا مش بتاع المهرجانات ولا دي سكتي وليس لدي علم ولا لي يد في هذا الاعتداء؛ لو رفع عليا قضية هكسبها لأنه سبق ورفع عليا كذا قضية وكسبتها لأن أنا لم أعتدي على حد وأكيد المحكمة هتنصفني".
وذكر: "مرة حد وزه وقاله خد بالك لأن في نص في القانون لو في 1-2-3 مش موجودين في التنازل يعتبر التنازل باطل هو عايز يرد أغانيه تبقي ملكه ويخلي المطربين يقولهم تعالوا خدوا مني التنازلات مرة تانية".
واختتم: "أنا باخد الأغنية منه وهو مش عارف مين اللي هيغنيها؛ لما خدت خليك فاكرني مكانش عارف أن عمرو دياب هيغنيها ولما خدت سهروني الليل مكانش عارف أن راغب علامة هيغنيها اللي هو بيدعيه دة أنا برئ منه؛ أنا قفلت أغنية لمطلب إسرائيلي جمهور بالملايين وبيغني قدامهم على المسرح ولكن مستخدم مطلع أغنية بتونس بيك".
