عمرو مصطفى مستنكرا: "بتوع المهرجانات بيغنوا ألحاني"

استنكر الملحن عمرو مصطفى؛ سرقة بعض ألحانه واستخدامها في أغاني المهرجانات مشيرا إلى أنه اكتشف ثلاثة من الحانة على الأقل يقوم بغنائها مطربي المهرجانات.

وقال مصطفى خلال برنامج "حديث القاهرة" المذاع على قناة "القاهرة والناس": "المنتج الكبير اللي بحترمه جدا الأستاذ محسن جابر بكن ليه الحب والتقدير؛ انتقد فكرة طرحي لاغنية من الحاني بصوت أم كلثوم باستخدام الذكاء الاصطناعي؛ أنا كاتب أن المصنف دة ذكاء اصطناعي وليس صوت أم كلثوم وحقوق الصوت ملك الالة وليس ملك الأسرة الذين يملكون الصورة".

وأضاف: "أنا اتاخد مني ألحان؛ الأستاذ محسن جابر بحبه؛ ولكن ألحاني بقي بيغنيها المهرجانات؛ احنا مش بنحافظ على التراث الموجود دلوقتي يبقي هنحافظ على التراث اللي مات؟".

وتابع: "تلت أغاني؛ العالم الله وأغنية تانية اسمها حبيبي لا واغنية تالته الحان عمرو مصطفى بيملكهم الأستاذ محسن جابر معمولين أغاني مهرجانات لحمو بيكا وحسن شاكوش".

وأوضح: "ممكن تلاقي الفيديو كمان على الانترنت؛ أنا كاتب كل حاجة عشان الناس اللي بتكلم؛ أغنية اسمها مهرجان قلبي كان مكسور والاغنية بتاعة فيجو الدخلاوي اسمها مهرجان أنتوا زي ولادي؛ ودي العالم الله تخيل عمرو مصطفى الحانه بيغنيها حسن شاكوش وحمو بيكا وفي مهرجان وأغنية عوكلو بتاعة محمد سعد وكل الحقوق دي راحت مني أنا".

وأكمل: "الأستاذ محسن ممضيني على كل حاجة وهو مسؤول عن تراثي وأنا حي وبيغنوه المهرجانات ولكن أنا بقول أنا متقبل منه أي حاجة؛ بس مشاريعي الجديدة من فضلك محدش يقرب منها".

وفي وقت سابق قرر المطرب والملحن عمرو مصطفى إحياء صوت كوكب الشرق، مستخدمًا تقنية الذكاء الاصطناعي وذلك من خلال طرح أغنية جديدة لها من ألحانه.

وروّج مصطفى للأغنية المقرر طرحها خلال الفترة القليلة المقبلة عبر حساباته الرسمية على مواقع التواصل الاجتماعي، ونشر مقطعًا قصيرًا من الأغنية وعلَّق قائلًا: "على مدار 24 سنة قدّمت العديد من الألحان لنجوم الوطن العربي، ومؤخرًا مع تطور التكنولوجيا والذكاء الاصطناعي، حبيت أسمع لو كوكب الشرق السيدة أم كلثوم غنّت من ألحان عمرو مصطفى هيكون إيه الناتج".