عمرو أديب يرد على الانتقادات الموجهة إلى شريف عامر بعد مداخلة الزعيم
علق الإعلامي عمرو أديب؛ على الهجوم الذي تعرض إليه الإعلامي شريف عامر على خلفية مداخلة في الفنان عادل إمام خلال برنامج “يحدث في مصر”.
وقال أديب خلال برنامج "الحكاية" المذاع على قناة "أم بي سي مصر": "شريف عامر وعادل إمام تقييمهم والأداء الأعلامي وأنا أقولك أيه الصح وأيه الغلط وهقولكم على سر الشغلانة؛ المذيعين نوعين نوع بيحسب الأشياء بشكل دقيق ونوع مبيحسبش حاجة خالص لا دا صح ولا دا غلط".
وأضاف: "أنا سألت كان الناس اللي عند عم عادل امام في البيت بيتكلموا مع شريف في التليفون وقالو احنا بنكلم شريف وقالهم أدوني أكلمه".
وتابع: "أنا مكلمتش شريف عامر ولكن أنا عارف شريف بيفكر ازاي؛ فكر أنه مش عايز يضغط على الراجل؛ وأقلكم كمان كلمة محدش عايز يقولها أنه يخليه يقول حاجة مش حلوة".
وأوضح: "شريف مش اللي هو مش عارف يسأله؛ أنا أقولك عشرين سؤال لعادل امام ولكن شريف كان مقدر أن الراجل داخل معاه يوم عيد ميلاده ومقدر أنه مش عايز يضايقه".
وأكمل: "في مذيع تاني معندوش المشكلة دي يعني ميحسبهاش؛ ممكن يبقي في معاك مصدر عايز أعصرك للأخر؛ وفي حد تاني بيقول مش قضية المداخلة أنا سعيد أن انت معايا ومش عايز أضايقك ولا أطول عليك ولا أبقي بايخ".
وواصل: "يا جماعة الشغل أنواع وكل واحد ليه طريقه فيه؛ في واحد يفكر بطريقه وواحد يفكر بطريقة تانية؛ شغلتنا دي قايمة على واحد من جزء من الثانية؛ أنا مش بقول إن بنعظم في نفسينا شغلتنا ليست بالسهولة بمكان أنت في ثواني معدودة يجب أن تقرر أشياء كثيرة أنا هعمل ايه هطول معاك والا هقصر؟".
وذكر: "أنا قعدت سنين الزعيم عادل إمام يكلمني باليل في البرنامج مساء الخير يا عمرو أقوله مساء الخير يا زعيم يقولي أنا داخل أنام بقي مع السلامة".
واختتم: "رفقا يا جماعة بالفكرة الناس ساعات مش كله انجاز؛ سألته سؤال مثلا ومردش مش في المود مش عايز؛ قرر شريف يكون لطيف وظريف وانسان؛ بقول لاخويا شريف معلش وأنت جميل؛ شريف انسان أوي".
