عمرو أديب يناشد الرئيس التدخل لمساعدة ضحايا حريق بني سويف.. والإسكان تستجيب

ناشد الإعلامي عمرو أديب؛ السيد الرئيس عبد الفتاح السيسي بالتدخل لمساعدة أصحاب المحال التجارية التي تعرضت إلى حريق ضخم في بني سويف.

وقال أديب خلال برنامج "الحكاية" المذاع على قناة "أم بي سي مصر": "أنا اشتغلت الشغلانة دي كتير وفاهم أن الحاجة دي مش هيحلها غير واحد؛ أنا بطلب من الرئيس عبد الفتاح السيسي أنه يشوف حل للنادس دي".

وأضاف: "يا ريس ياما حاجات من دي اتعملت وياما نزل جهات حكومية وجهات من القوات المسلحة وأنا شفت بنفسي الهيئة الهندسية نزلت ترمم وتعيد البناء أنا بتوجه بالنيابة عن أهالي بني سويف وشباب بني سويف؛ هي محتاجة كلمة من الرئيس".

وتابع: "الرئيس يقول كلمة أنه يا جماعة أنزلوا شوفوا الحكاية دية وعايز أشوفها خلصانة على طول؛ دا رزق ناس والناس مش ناقصة اليومين دول؛ الامر محتاج جبر خواطر وطبطة؛ الدولة يجب تسمع الناس دول خبر عن المأساة اللي هما فيها".

وأوضح: "أنا بأناشد جهات الدولة والرئيس عبد الفتاح السيسي؛ لو سمحت يا ريس الشباب دية محتاجة الغوث؛ الستر والجبر وهنا يجي دور الدولة ومعلش الدولة مركزية محتاجة تحرك أسرع من كدة؛ لو الرئيس يصدر توجيهاته وتنزل المقاولين العرب او الهيئة الهندسية أو تحالف شركة مقاولات تشيل دة كلة؛ الموضوع محتاج تدخل سريع".

وأكمل: "في الفاصل مكتب السيد وزير الإسكان اتصل بينا وقال إن شركة المقاولين العرب وجهاز التعمير بالصعيد جاهزين للقيام بعمل اللازم في محلات بني سويف؛ قضي الأمر هي دي مصر اللي أنا أعرفها محدش يتساب في الشارع".

وذكر: "النهاردة الناس اللي بتمتلك الـ75 أو الـ100 محل دول النهاردة في هذه اللحظة عرفوا أن الدولة المصرية قررت من خلال أذرعها التعميرية أنهم هيدخلوا يخلصوا الموضوع؛ احنا بنوجه رسالة لشباب بني سويف أن الدولة لن تتركهم".

واختتم: "احنا بنتكلم عن أساتذة التعمير؛ ناس بتعمل أشياء دا بالنسبالهم شيء بسيط؛ احنا بنشكر مكتب السيد وزير الإسكان وبنشكر الدولة المصرية وكل من اهتم ووجه بعمل الإصلاحات والترميمات ولو المدرسة اللي جنب السوق حصلها أي مشاكل أيديكم بالمرة".