النائب فريدي البياضي: "الحكومة غرقتنا وأفقرت الشعب وأطالب بإقالتها"
قال النائب فريدي البياضي عضو مجلس النواب، ونائب رئيس الحزب المصري الديمقراطي الاجتماعي: “في كلمات مختصرة، أوجه كلامي للحكومة وأنا أرفض التقرير وأقول باختصار كفاية ديون”.
جاء ذلك في تعليقه على الحساب الختامي لموازنة الحكومة ٢٠٢١/٢٠٢٢ بالجلسة العامة لمجلس النواب اليوم الأربعاء.
وواصل حديثه الموجه للحكومة: “غرقتونا وخنقتونا إحنا واللي خلفونا واللي خلفناهم واللي هايخلفوهم.. الوزير بيقول أرقام ونسب وبيحاول يثبت إن نسبة الدين في تحسن.. يا إما أرقامك وهمية يا وزير.. وأنا متأكد من كدا لأن الـ٨٧٪ دول مش حاطط فيهم ٢٤٪ ديون الهيئات الاقتصادية وحاسب سعر الدولار على ١٨ جنيه.. يا إما لو أنت صح يبقى إحنا اللي واهمين.. والمواطن اللي بيعاني كل يوم وبيصرخ دا مواطن مش حقيقي.. إحنا بنتكلم على إجمالي ديون تعدت١٠ تريليون وتجاوزت إجمالي الناتج المحلي وفوائد ديون بتاكل نصف المصروفات”.
وتابع: “كفاية انتهاك للدستور.. حرام عليكم أنتم أقسمتم على احترامه.. النسب اللي حددها الدستور للتعليم والصحة في ٢٠١٤ واللي مفروض تزيد كل سنة.. الحكومة ما بتصرفش ربع النسب دي.. الوطن لن ينصلح حاله إلا لما تعرفوا أهمية وأولوية التعليم والصحة.. وتعرفوا إن الحل في الاستثمار في البشر مش في الحجر”.
وختم النائب: “كفاية على الحكومة.. إحنا قدام حكومة لا تحكم.. ولا تستطيع أن تحكم.. حكومة أفقرت كل طبقات الشعب بلا استثناء.. من ٣ سنين تحت قبة المجلس طالبت وحدي بإقالة الحكومة.. واليوم مع كثير من النواب ومع جموع الشعب نصرخ.. كفاية كفاية كفاية”.
