عمرو أديب: "جوهر الحوار الوطني أن الناس متبقاش طايقة بعضها"
أكد الإعلامي عمرو أديب، أن جوهر الحوار الوطني وأي حوار سياسي هو الاختلاف في الرأي مشيرا إلى أنه من الطبيعي أن يكون الموجودين في الحوار غير متفقين.
وقال أديب خلال برنامج "الحكاية" المذاع على قناة "أم بي سي مصر": "جوهر هذا الموضوع أنه حوار؛ وفي الحوارات السياسية في العالم كله أما يبقي في اتجاهين أو تلات اتجاهات الناس المفروض متبقاش طايقة بعضها ودا طبيعي جدا أنا مش المفروض أكون طايقك أو مبسوط منك".
وأضاف: "أما الديموقراطيين والجمهوريين بيتكلموا مع بعض في أمريكا بيبقوا مش طايقين بعض هي دي الشغلانة؛ الحوار بينا أو الصراع بينا أن أحنا مش عاجبين بعض وأنا دوري كله أن أقعد أقولك إن الكلام اللي بتقوله دة غلط ودا طبيعي ياجماعة".
وتابع: "العمال والمحافظين في بريطانيا مش طايقين بعض هي دي الحكاية؛ مفيش حوار سياسي فيه أننا نحب بعض أحنا دورنا أن كل واحد فينا عنده رؤية احنا عايزين نفيد البلد؛ لقيت لما الحوار الوطني ابتدا ناس كتير مضايقة؛ مين دول ومين اللي قاعدين دول ومينفعش كدة وطبعا كان في ملاحظات على كلام عمرو موسى ودكتور حسام بدراوي؛ ياجماعة هو دة الحوار مينفعش ماتش كورة ينزل فيه فرقة واحدة".
وأكمل: "مينفعش ماتش الأهلي والزمالك الأهلي ينزل والزمالك مجاش لأن دة مش ماتش وطبيعي الفرقتين مش طايقين بعض بس في قواعد للعبة وقواعد للموضوع؛ وطبيعي جدا كتير هتسمع حاجات متعجبكش من الطرفين؛ أنت هنا مش عاجبك الكلام بتاع التيار المدني والناس التانيين مش عاجبها الناس بتوع الحكومة".
وواصل: "الحوار دة كان متأجل لأسباب كثيرة أنه عندنا مشاكل وفي إخوان وخلاص هذا الأمر قد هدأ وآن أوان الحوار وانا مش عايز الناس يكون عندها أي حساسية؛ الدور في الحكاية أيه الاستيعاب والتحمل؛ أنت لو مش هتتحمل الرأي الأخر يبقي الموضوع ملوش لازمة".
وأكمل: "الحوار الوطني هو من أفكار الدولة والإدارة المصرية أننا محتاجين حوار وطني ومحتاجين نسمع بعض؛ هتسمع حاجات مش عجباك ولكن مينفعش الاقصاء أو المنع؛ لو أنت قلت أنا مش عايز دة ومش عايز دة يبقي خلال الحوار انتهي".
واختتم: "أنا معنديش مشكلة أنه ميعجبكش الكلام؛ العالم كله كده الناس بتقعد تناقش مواضيعها بعنف وتوحش ودفاع مرير وممكن تجد فئة من الناس قليلة وليهم رأي".
