أحمد موسى: وجود السوق الموازية للدولار يعني استمرار الأزمة التي تعاني منها البلاد
أكد الإعلامي أحمد موسى أن وجود السوق الموازية للعملة الأجنبية يعني استمرار المشكلة الحالية التي تعاني منها البلاد.
وقال موسى خلال برنامج "على مسؤوليتي" المذاع على قناة "صدى البلد": "طول ما في سوق موازية يبقي عندنا مشكلة؛ المستورد هل النهاردة بتديله من البنك المركزي؟ مبتديلوش زي الأول فبيلجأ للسوق السوداء".
وأضاف: "السياحة زادت والغاز والبترول زادت ولكن في حاجات تانية عندي فيها عجز كبير؛ معندناش شفافية كام مستثمر جولي؟ لما عملنا التعديلات دي كام واحد جه؛ وكام واحد مجاش ألاقي واحد من يومين بيكلمني بيقولي على شركة عايزين يخدوها بيتكلموا في 25 مليون دولار والله عيب أيه 25 مليون دولار؟".
وتابع: "الحاجات دي محتاجين نوضح للرأي العام ويبقي في شفافية؛ أحنا زودنا السولار أمبارح؛ زيادة السولار أخطر من البنزين لأن السولار كل حاجة وطبيعي لما تزود السولار كل حاجة تزيد؛ الناس شايفة وعايشة من الخميس لغاية النهاردة الأسعار زادت قد ايه؟ ومحدش يقولي مزادتش".
وواصل: "لازم خطابنا مع الرأي العام لازم يكون شفاف أقوله الحقائق والمشكلات والأزمات والتحديات عشان يبقي معايا؛ وأنا عندي حلول والا معنديش؛ السيد الرئيس مش لازم كل يوم يعمل مؤتمر يشرح للناس في دور للحكومة ايه المشكلة؟ دور كل وزير يطلع يقول للناس؛ هل في حد طلع قال للإعلام أدى تفاصيل القرار بيطلع بيان ومتشكرين السلام عليكم؛ هو مطلوب من الإعلام أنه يطلع يبرر؟".
وأوضح: "من يوم الخميس للنهاردة الرز زاد؛ حد يقول لا؟ السادة المحافظين قالوا نحدد تعريفة المواصلات في حد التزم بيها؛ قلتله زود ربع جنيه هل حد زود ربع جنيه أو 50 قرش؟ لا دا في ناس زودت جنيه وخمسة جنيه كل وسائل النقل زادت".
وأكمل: "قررنا زيادة مش عارف كذا وننزل نعمل حملات ونطمن؛ ما تنزل تعمل حملة هو أنت هتفضل قاعد في الشارع يعني؟ السواق واللي عنده عربية يقولك لا والله دا معناه ايه؟ أنه حصل زيادة في كذا وكذا؛ ما هي الرقابة هتعمل ايه الرقابة هتعقد تجري ورا الناس في الشارع؟ إذا هو جواه مش ملتزم مش هتقدر تعمله حاجة"
واختتم: "يقولك أصل هنواجه تواجه ايه؟ هو أنت هتركب مع الناس في الميكروباص؟ هو جاي في نص الطريق أدفع وبتدفع قبل ما يتحرك الأجرة كذا مش عاجبه ينزل والمواطن محتاج المواصلة معندوش بديل تاني".
