عمرو أديب يعلق على زيادة السولار: "المسألة لم تعد تحتمل"

طالب الإعلامي عمرو أديب؛ المتأثرين من زيادة أسعار السولار بعدم المبالغة في رفع أسعار الخدمات والسلع التي يقدمونها مشيرا إلى أن المواطن المصري لم يعد يتحمل.

وقال أديب خلال برنامج "الحكاية" المذاع على قناة "أم بي سي مصر": "السولار سعره زاد اليومين اللي فاتوا؛ وغنيا على البيان أن السولار لما بيرتفع في حته بيرفع أسعار حاجات كتير جنبه ودا أمر واقع؛ مثلا لما هتطلع الأرقام الرسمية عن التضخم في الشهر دة اللي حصل فيه الزيادة في المواد التموينية والسولار هتلاقي التضخم زاد".

وأضاف: "ابتدينا نشوف الخناقات بتاعة الميكروباصات الناس بدل ما زودت جنيه زودت جنيه ونص هنبتدي نشوف زيادة في أسعار الفاكهة والخضار وأسعار النقل كله بشكل عام وجايز في أسعار المخابز".

وتابع: "الدولة قالت أحنا مش قادرين نستحمل سعر السولار بعد عشرات الشهور بالسعر دة؛ اللي أنا بس بطلبه أنه طالما كدة كدة هترفعوا الأسعار يبقي بشويش؛ الأسعار ارتفعت وأنا بقول كدة أن الأسعار قد زادت في السولار وهتسمع في أسعار تانية كتيرة".

وواصل: "كل اللي أنا بطلبه بس أن الناس بتاعة الميكروباصات بدل الحاجة ما تزيد جنيه ونص تزيد جنيه؛ بدل ما هتزود النقل بتاع الخضار والفاكهة 20% تبقى 10% اكسبوا بشويش أنا عارف أن الناس في مصر بتتلكك أنا عارف أنه من حقكم مادام السولار زاد هنزود على الناس".

وأوضح: "اللي أنا بقوله بشويش على الناس لأن المسألة لم تعد تحتمل؛ وهذا الشهر في حاجات كتير زادت والناس يادوبك بتتحمل وتكمل؛ أنا بطلب من التجار والناس بتاعة النقل أنهم لما يجيوا يرفعوا الأسعار بلاش افترا بلاش كتير".

وأكمل: "الأسعار هتترفع من حقك لأن السولار لما بيزيد مصاريفك بتزيد؛ ولكن زود بالنسبة العاقلة اللي ممكن نستحملها؛ الناس طالعة من رمضان ومن مصاريف كتير ورجعت المدارس ومصاريف كتيرة زادت لو سمحتوا بشويش على الناس".

واختتم: "المسألة مفهومة أن الدولة قالت والله أنا مقدرش أمسك على السولار أكتر من كدة زي ما قالت مقدرش أمسك على السلع التموينية أكتر من كدة ولذلك كل اللي بطلبوا من حضراتكم التريث والرحمة".